Ku Pfumelelana Ni Ndlela Ya Yehovha Hi Ku Titsongahata — Watchtower LAYIBURARI YA LE KA WEB SITE

Xiviko Xa Vahuweleri Va Mfumo

Ku Pfumelelana Ni Ndlela Ya Yehovha Hi Ku Titsongahata

“LAV̌ANI Yehova, ṅwina, v̌atiṭongahati hikwav̌o v̌a tiko.” Xirhambo lexi lexi twarisiweke hi muprofeta wa Muheveru Sofoniya ku tlula malembe-xidzana ya 26 lama hundzeke, xa ha hundziseriwa eka vanhu emisaveni hinkwayo namuntlha. (Sofoniya 2:3) Xana swi vula yini ku lava Yehovha? Ku endla tano swi sungula hi ku nghenisa vutivi bya Xikwembu xi ri xin’we xa ntiyiso ni lexi hanyaka, Yehovha.—Yeremiya 10:10; Yohane 17:3.

Hambiswiritano, ku nghenisa vutivi hi koxe a ku yisi exiyin’weni xa ku amukeleka emahlweni ka Xikwembu. Leswaku munhu a amukeleka emahlweni ka Xikwembu, u fanele a tlhela a byi tirhisa vutivi lebyi. Hi ndlela yihi? Hi ku endla leswaku mianakanyo ya yena ni mahanyelo ya yena swi pfumelelana ni mimpimanyeto ya Xikwembu hi ku titsongahata, hilaha swi kombisiweke hakona hi ntokoto lowu landzelaka wa le Suriname.—Vaefesa 4:22-24.

Eddy, mudyondzisi wa le xikolweni loyi a nga emalembeni ya yena ya le xikarhi ka va-30, a lava tinhlamulo leti enerisaka ta swivutiso swo tanihi leswi nge: ‘Xana vukhongeri byi pfuna yini evanhwini va namuntlha?’ na lexi nge ‘Xana Bibele, buku ya khale ya pfumelelana ni sayense ya manguva lawa?’ Loko Timbhoni ta Yehovha ti n’wi endzerile ivi ti n’wi nyika tinhlamulo leti sekeriweke eBibeleni ta swivutiso leswi, Eddy u yingise hi vukheta. U tlhele a tsala ni tinhla leswaku a ta kambisisa tinhlamuselo ta Timbhoni.

Emahlweninyana, Eddy a ri wa vukhongeri lebyi n’wi dyondziseke leswaku vanhu va ve kona hi ku va Xikwembu xi va hundzule tinkawu. Kutani loko Timbhoni ti n’wi nyike buku leyi nge Life—How Did It Get Here? By Evolution or by Creation? u yi teke hi nkarhi wolowo. Nhlamuselo ya buku leyi leyi nga erivaleni ya mhaka ya ku tumbuluxa ya Bibele yi n’wi tsakisile. Hi dyondzo ya yena ya Bibele, u khorwisekile leswaku u kume ntiyiso!

Kambe sweswi a a langutane ni ndzingo. Eddy a tshama endlwini leyi a ku hanyiwa hi ku yiva ni ku nga tshembeki. Xisweswo, a langutane ni nhlawulo: wa ku landzela mahanyelo yo biha ya vanhu lava a tshama na vona kumbe a ala mahanyelo wolawo a amukela ndlela ya mahanyelo lama dzunisaka Xikwembu. Hi vutlhari, Eddy u hlawule leyo hetelela. U tseme xinghana ni vanhu lavaya vo biha a tlhela a rhurha endlwini yoleyo.—1 Vakorinto 15:33, 34.

Eddy u endle nhluvuko hi xihatla endzhaku ka loko a sungule ku va kona eminhlanganweni eHolweni ya Mfumo. U tlhele a antswisa ndlela leyi a ambalaka ni ku tilunghisa ha yona ivi a sungula ku vulavula ni vanghana ni maxaka malunghana ni leswi a swi dyondza. Endzhakunyana, a tsake ngopfu loko a amukeriwile leswaku a hlanganyela eku chumayeleni ka “mahungu lamanene” erivaleni. (Matewu 24:14; Mintirho 20:20) Hi December 1996 siku leri a ku ri khale a ri rindzerile ri fikile ivi a kombisa ku tinyiketela ka yena eka Yehovha hi nkhuvulo wa mati.

Lembe na lembe, magidi ya madzana ya vanhu va timbilu to tshembeka va angula kahle eka xirhambo xo ‘lava Yehovha.’ Hi ku endla tano, va tokota ntiyiso wa Swivuriso 22:4, leyi nge: “Hakelo ya ku tiṭongahata ni ya ku tšhav̌a Yehova, i rifuwo, ni ku kwetsima, ni v̌utomi.” Ina, hi ku pfumelelana ni ndlela ya Yehovha hi ku titsongahata, varhandzi va ntiyiso va tsakela mikateko yo tano sweswi, naswona va langutele mikateko leyi nga heriki laha emisaveni hi ku tiyiseka.—Pisalema 37:29.

[Mimepe leyi nga eka tluka 18]

(For fully formatted text, see publication.)

Caribbean Sea

GUYANA

SURINAME

FRENCH GUIANA

BRAZIL

[Xihlovo Xa Kona]