Xana U Nga Swi Kota Ku Hambanisa Leswinene Ni Leswo Biha?
“A ndzi ri ni vutihlamuleri byo dlaya vanhu va kwalomu ka 25. . . . Ndza swi vona hi tihlo ra mianakanyo vusiku byin’wana ni byin’wana, siku rin’wana ni rin’wana. Ndzi va ni milorho yo chavisa. . . . Kun’wana ni kun’wana laha ndzi yaka kona ndzi vona xikandza lexi ndzi tsundzuxaka vanhu lava ndzi va dlayeke. Sweswo ndzi swi vona kahle, onge hi loko swi humelele namuntlha, sweswi. . . . A ndzi nge tirivaleli hi swilo leswi ndzi swi endleke.”—V.S.
“Ndzi lerisiwe ku nghena ndzi ya dlaya nala. . . . A ndzi yimanganyana ndzi ehleketa hi leswaku nala i vavanuna, vavasati ni vana. . . . Hi nkarhi wolowo ndzi swi vonile naswona ndza ha swi vona leswaku ndzi endle hilaha a ndzi lerisiwe hakona naswona ndzi hetisise swileriso leswi a ndzi nyikiwe swona, kutani a ndzi tivoni nandzu.”—W.C.
HI March 16, 1968, vavanuna lavambirhi lava tshahiweke laha henhla va hlanganyele eka leswi endzhakunyana a swi ta ahluriwa tanihi nyimpi yo biha ya vugevenga. Vona, swin’we ni masocha man’wana, va nghene eximutanini xa le Vietnam ivi va dlaya madzana ya vaaka-tiko—ku katsa ni vavasati, vana ni vakhalabye. Kambe xiya n’wangulo lowu hambanaka wa masocha lamambirhi. Socha ro sungula ri karhatiwa swinene hi leswi ri swi endleke. Ra vumbirhi ri vona onge swiendlo swa rona a swi ri enawini. Xana vanhu vambirhi va nga angula hi ndlela leyi hambaneke swonghasi eka ntokoto lowu fanaka hi ndlela yihi?
Nhlamulo yi fambisana ni ripfalo—vuswikoti lebyi hi nyikiweke byona hi Xikwembu lebyi hi pfunaka ku tikambisisa hi ku tshembeka ni ku avanyisa swiendlo ni makungu ya hina. Ripfalo i ku titwa ka hina ka le ndzeni ka leswinene ni leswo biha.
Loko vanhu van’wana va endla swiboho, va tala ku tirhisa xivulwa lexi nge, “Ripfalo ra wena a ri ku kongomise.” Hambiswiritano, lexi vavisaka a hi minkarhi hinkwayo ripfalo ri tshembekaka. Entiyisweni, vo tala va amukerile ni ku endla tihanyi leti chavisaka, naswona mapfalo ya vona a ma va karhatanga nikatsongo. (Yohane 16:2; Mintirho 8:1) Hilaha Samuel Butler, mutsari wa swirungulwana wa Munghezi a tshameke a vula hakona, ripfalo “ri hatla ri tshika ku tirha eka lava va nga swi laviki ku ri yingisa.”
Xana u nga ri tshemba ripfalo ra wena? Nhlamulo yi titshege swinene hi ndlela leyi ri dyondzisiweke kahle ha yona, hilaha xihloko lexi landzelaka xi nga ta kombisa hakona.
[Laha Xifaniso Xi Humaka Kona eka tluka 3]
Upper war scene: U.S. Signal Corps photo