Nyimpi Leyi Onheke Lembe-xidzana Ra Vu-19

1914

LOKO a anakanyisisa hi gidi ra malembe lerintshwa, Charley Reese, mutsari wa phepha-hungu ra The Orlando Sentinel, u tsarile a ku: “Nyimpi ya 1914-18 leyi onheke lembe-xidzana ra vu-19 a yi helanga.” Xana a a vula yini? U te: “Matimu a ma lawuriwi hi masiku. Lembe-xidzana ra vu-19—leri hlamuseriwaka tanihi nhlengeleto wa tidyondzo, ku tikukumuxa, malangutelo ni mahanyelo—a ri helanga hi Jan. 1, 1901. Ri hele hi 1914. Na rona lembe-xidzana ra vu-20 leri hlamuseriwaka hi ndlela leyi fanaka ri sungule hi nkarhi wolowo. . . .

“Kwalomu ka tinyimpi hinkwato leti a hi karhateka ha tona vutomi bya hina hinkwabyo ti vangiwe hi nyimpi yoleyo. Kwalomu ka swiendlakalo hinkwaswo swa vutlhari ni ndhavuko leswi hi hanyeke ha swona swi vangiwe hi nyimpi yoleyo. . . .

“Ndzi ehleketa leswaku yi onhile swonghasi hikuva yi herise ntshembo wa leswaku vanhu va nga lawula vumundzuku bya vona. . . . Nyimpi yoleyo yi vangele vanhu ku lahla dyondzo yoleyo ya mavunwa. Ku hava ni un’we enyimpini loyi a anakanyeke leswaku swi ta va hi ndlela leyi swi veke ha yona. Yi herise mimfumo ya Britain na Furwa. Yi dlaye vavanuna vo tala va le Britain, Furwa na Jarimani. . . . Hi nkarhinyana wutsongo, yi dlaye vanhu va 11 wa timiliyoni.”

Ku tlula malembe ya 120, Timbhoni ta Yehovha ti kombetele eka 1914 tanihi ku hela ka leswi Yesu a swi vitaneke “nkarhi lowu vekiweke wa matiko.” (Luka 21:24) Hi lembe rolero, Yesu Kreste la pfuxiweke ni la kwetsimisiweke u vekiwe tanihi Hosi ya Mfumo wa le tilweni. Hi ku tirhisa Mfumo wolowo, Yehovha Xikwembu u ta herisa ku xaniseka hinkwako loku fungheke lembe-xidzana leri, a ku herisela makumu.—Pisalema 37:10, 11; Eklesiasta 8:9; Nhlavutelo 21:3, 4.

[Laha Xifaniso Xi Humaka Kona eka tluka 32]

U.S. National Archives photo