“Ku Ni Swo Tala Leswi Hina Makhatoliki Hi Nga Swi Dyondzaka Eka Vona”

MARITO lawa lama vulavulaka hi Timbhoni ta Yehovha ma vuriwe hi mudyondzisi wa le Bari, eItaly, loko a ri karhi a dyondzisa ntlawa wa xikolo xa le henhla hi matimu ya vukhongeri. Mudyondzisi u byele ntlawa lowu leswaku u ta tirhisa tikhasete ta vhidiyo eku dyondziseni ka yena. Loko xichudeni xin’wana xi twa sweswo, ku nga Roberto wa malembe ya 18 hi vukhale, xi ringanyete ku katsa vukhongeri bya xona eka dyondzo leyi. U nyike mudyondzisi vhidiyo leyi nge Jehovah’s Witnesses—The Organization Behind the Name. Mudyondzisi u xi amukerile xikombelo xa Roberto, kutani ntlawa hinkwawo lowu nga swichudeni swa kwalomu ka 30 wu hlalele vhidiyo leyi. Roberto u ri: “Hinkwavo va tsakisiwe hi vun’we, nhleleko ni rirhandzu ra xiviri leri nga kona exikarhi ka Timbhoni ta Yehovha. Naswona a va hlamarile swinene ku twa leswaku n’hweti na n’hweti ku kandziyisiwa tikopi ta Xihondzo xo Rindza ta timiliyoni ta 40 ni timiliyoni ta 36 ta Xalamuka!”

“A ndzi nga anakanyi leswaku mi nga va mi hleleke hi ndlela leyi,” ku vule vadyondzi-kulobye vo hlayanyana va Roberto endzhaku ka ku vona vhidiyo. Malunghana ni Timbhoni ta Yehovha, mudyondzisi u byele ntlawa lowu a ku: “Xiyani ndlela leyi ripfumelo ra vona ri va susumetaka ha yona leswaku va va ni vun’we ni nhleleko wonghasi. Ku ni swo tala leswi hina Makhatoliki hi nga swi dyondzaka eka vona.” Vhidiyo swin’we ni mbulavurisano wa le tlilasini lowu veke kona endzhaku, swi va pfunile swinene leswaku va kota ku twisisa Timbhoni ta Yehovha ku antswa.