“I Mani La Vekeke Vutlhari eMapapeni”?

“LOKO mi vona papa ri humelela eswiphen’wini swa le vupela-dyambu, xikan’we-kan’we mi ri, ‘Xidzedze xa ta,’ kutani swi va hi ndlela yoleyo. Kutani loko mi vona leswaku mheho ya le dzongeni ya hunga, mi ri, ‘Ku ta va ni ku hisa,’ kutani ku va kona.” Marito lawa ya Yesu lama tsariweke hi mutsari wa Evhangheli Luka, i swikombiso swa ku vhumbha ta maxelo hilaha a swi endliwa hakona le Palestina wa khale. (Luka 12:54, 55) Eka swiyimo swin’wana, vanhu va khale a va hlaya mimfungho kutani va vhumbha hi ku pakanisa, kambe swi va swa xinkarhana.

Namuntlha, vativi va ta maxelo va tirhisa switirho leswi rharhanganeke, tanihi hi tisataliti leti rhendzelekaka hi misava, xitirho xa Doppler ni tikhompyutara leti nga ni matimba leswaku va pima endlelo ra maxelo ku ringana minkarhi yo leha. Kambe hakanyingi ku vhumbha ka vona ku va ku hoxile. Hikwalaho ka yini?

Ku na swilo swo tala leswi endlaka leswaku ku vhumbha ta maxelo hi ku pakanisa swi nonon’hwa. Hi xikombiso, ku cinca ka mahiselo loku nga languteriwangiki, moya wo tsakama, ntshikilelo wa moya ni rivilo ra moya kun’we ni tlhelo ra ndhawu, swi nga ha rharhanganisa swilo. Ku engetela eka leswi, ku ni ku tirhisana loku rharhanganeke ka dyambu, mapapa ni malwandle, swi nga leswi tintlhari ti nga swi twisisiki hi ku hetiseka. Hikwalaho ka xivangelo lexi, ku vhumbha ta maxelo ku tshama ku ri loku nga pakanisekiki hi tlhelo ra sayense.

Ku hikiwa ka vutivi bya munhu mayelana ni maxelo ku hi tsundzuxa swivutiso leswi vutisiweke Yobo: “I mani la velekeke mberha? Entiyisweni ayisi yi huma ekhwirini ra mani? . . . Xana u nga tlakusa rito ra wena ri fika ni le papeni, lerova mati yo tala ngopfu ma ku funengeta? . . . I mani la vekeke vutlhari emapapeni, kumbe, i mani la nyikeke xiendlakalo xa le xibakabakeni eku twisisa? I mani loyi hi vutlhari a nga hlayaka mapapa hilaha ku pakanisaka, kumbe makhuwana ya mati ya tilo—i mani la nga ma voyamisaka a ma chulula?”—Yobo 38:28-37, NW.

Nhlamulo ya swivutiso leswi hinkwaswo hi leyi nge, Swi endliwe hi Yehovha Xikwembu hayi munhu. Ina, hambiloko vanhu va nga ha tikomba va tlharihile, vutlhari bya Muvumbi wa hina byi tlakukile, byi tlakuke hi ndlela leyi nga pimiwiki. Hakunene u hi kombise rirhandzu hileswi a endleke vutlhari byakwe byi kumeka eBibeleni, leswaku hi ta endla tindlela ta hina ti humelela.—Swivuriso 5:1, 2.