Rirhandzu Leri Tiyeke Ku Tlula Ra Manana

ESWITICHINI swa switimela leswi fambaka hi le hansi ka misava, eswihambukelweni swa mani na mani, kumbe eswitarateni leswi nga tala hi vanhu, vamanana va cukumeta vana va vona lava ha ku velekiwaka. Minkarhi yin’wana, vatleketli va thyaka va kuma swivanana emathinini ya thyaka, leswi rileleke vamana wa swona swi kala swi karhala. Hi ku ya hi O Estado de S. Paulo, “milandzu ya tincece leti cukumetiwaka eswitarateni ya andza.” Ina, manana lontsongo a nga ha tisola endzhakunyana hikwalaho ka xiendlo xa yena. Kambe, hi ku heleriwa hi ntshembo, wa n’wi cukumeta, hambileswi swi nga ha koxaka vutomi bya n’wana wa yena.

U nga ha tivutisa, ‘Swi ta njhani manana a kala a ehleketa ku cukumeta n’wana wakwe a ri karhi a nga tivi ni lomu a nga ta helela kona?’ Bibele yi tirhisa xiyimo xo tano lexi twisaka ku vava tanihi xigego xo kombisa ku hambana lokukulu ka mintlhaveko ya Mutumbuluxi eka lava va nga va yena: “Šana mana wa munhu a nga riv̌ala šihlangi ša yena, a nga tweri v̌usiwana l’a humeke khurini ra yena šana? Hambi loko a ṅwi riv̌ala, mina nḍi nga ka nḍi nga ku riv̌ari!”—Esaya 49:15.

Entiyisweni, ku tlula manana wihi na wihi la nga munhu, Xikwembu xi hi rhandza hi rirhandzu leri enteke naswona xi tiva swilaveko swa hina. Hambiloko u ri muntshwa kumbe munhu lonkulu, ku nga khathariseki leswaku u langutana ni xiphiqo xa njhani, a wu wexe. Mutumbuluxi wa wena u lava ku ku pfuna naswona u tsakela ku ku vona u hlayisekile. Hi ku ya hi marito ya mupisalema, “hambi loko tatana na manana v̌a nga nḍi ṭhika, Yehova o ta nḍi rola.”—Pisalema 27:10.

Emisaveni hinkwayo, timagazini ta Xihondzo xo Rindza ni Xalamuka! ta kandziyisiwa leswaku ti nyikela vutivi bya Yehovha, “Xikwembu xin’we xa ntiyiso,” ni N’wana wa yena, Yesu Kreste, leswi nga vulaka vutomi lebyi nga heriki eka lava hi ku tlangela va byi tirhisaka.—Yohane 17:3.