“Ku Leha Ku Fana Ni Mukedari Wa Le Lebanoni”

ETINTSHAVENI to saseka ta le Lebanoni ku mila mirhi leyi tivekaka yi ri Arz Ar-rab, leswi vulaka “Mikedari ya Hosi.” Mirhi leyi leyikulu, leyi tshamaka yi ri ya rihlaza, leyi nga tshama yi funengeta tintshava, ku vulavuriwa hi yona eBibeleni minkarhi ya kwalomu ka 70—ku tlula mirhi hinkwayo.

Leswaku ma hlamusela mikedari leyi leyikulu ya le Lebanoni, Matsalwa ma tirhisa marito ‘hlawuleka’ na ‘lowukulu.’ (Risimu ra Tinsimu 5:15; Ezekiyele 17:23) Mpimo wa mukedari ni ku khomelela ka ntsandza wa wona i khale swi bumabumeriwa eku akeni ka tiyindlu ni swikepe swin’we ni le ku endliweni ka fanichara. Nun’hwelo ni muvala wo tshwuka swa ntsandza lowu, swi koka-mahlo swinene, ni mafi ya wona yo tala ma endla leswaku wu nga boli naswona wu nga hlaseriwi hi switsotswana. Mirhi leyi yi lehe swinene naswona i yikulu, yi kota ku leha ku fikela eka timitara ta 37 ni vuanamo bya timitara ta 12, nakambe yi ni timitsu leti yaka ehansi swinene, leti tiyeke. A swi hlamarisi leswi vanhu van’wana va manguva lawa, lava tirhanaka ni makhwati va yi vitanaka “harhi leyi vangamaka eka ntlawa wa swimilana”!

Ezekiyele, mutsari wa Bibele, hi ndlela ya ku profeta u fanise Mesiya na xirhabyana xa mukedari, lexi Xikwembu hi xoxe xi xi byaleke hi nkarhi wolowo. (Ezekiyele 17:22) Entiyisweni, rito ra Xiheveru leri vulaka “mukedari” ri huma eka rimitsu leri vulaka “ku tiya.” Namuntlha, hilaha ku fanaka, valandzeri va Mesiya, Yesu Kreste, swa laveka leswaku va ‘tshama va tiyile eripfumelweni, va va ni matimba,’ ku fana ni mukedari wo leha, lowu pfumelelanaka ni swiyimo. (1 Vakorinto 16:13) Xana leswi swi nga hetisisiwa hi ndlela yihi? Hi ku yi bakanya hi matimba minkucetelo leyi nga riki ya Vukreste, ni ku yima va tiyile eku tiyiseleni ka vona endleleni ya vutshembeki ni ya ku tinyiketela eka Xikwembu. Lava va endlaka tano, eBibeleni va hlamuseriwa va ri “lava lulameke . . . [lava] lehaka ku fana ni mukedari wa le Lebanoni.”—Pisalema 92:12, The New English Bible.