“Mi Vanhu Lava Xikwembu Xi Langutelaka Leswaku Hi Va Vona”

HI KU tirhisana ni valawuri va tiko “hikwalaho ka Hosi,” Vakreste va nga langutela ku “dzunisi[wa tanihi] vaendli va leswinene.” (1 Petro 2:13-15) Timbhoni ta Yehovha eAfrika Dzonga ti tokote leswi enkarhini lowu hundzeke eka ntsombano wa muganga lowu ti veke na wona eholweni ya kholichi.

Hi siku ro sungula ra ntsombano, maphorisa ya vusirheleri ya kholichi a ma tilulamisele ku langutana ni nhlayo ya vatsombani lava karhataka ni lava nga riki ni ntirhisano, tanihi leswi va swi tokoteke eka mintsombano yin’wana. Hambiswiritano, leswi a va nga si tshama va tirhisana ni Timbhoni ta Yehovha, a va ta sala va hlamele!

Tanihi ntolovelo wa vona wa ku secha etinyangweni, maphorisa ya vusirheleri ya sechile movha wun’wana ni wun’wana lowu nghenaka ni lowu humaka endhawini leyi. Hambileswi vasechi va hlweriseke vapfhumba, va hlamarile loko va kombisiwa moya wa xinghana, ku lehisa mbilu ni xichavo. A ku vanga ni un’we la aleke ku sechiwa, ku holova ni nhlambha, tanihi leswi sweswo swi tolovelekeke. Ku hlamusele ndhuna yin’wana ya vusirheleri: “Ku hambana ni vaendzi van’wana, mi kombisa moya wa ku titsongahata ni ku xiximeka loku ku nga lo tlangandla eka hina.”

Loko ndhuna ya vusirheleri yi lemuka ntirhisano wa Timbhoni ta Yehovha, yi anakanye leswaku a swi nga fanelanga leswaku ku sechiwa mimovha, “hikuva,” hi ku vula ka yona, “mi leteriwe kahle ngopfu.” Hikokwalaho, mimovha leyi a yi namaketiwe mimfungho yo paka leyi nge “JW,” a yi nghena handle ko sechiwa.

Emakumu ka ntsombano, ndhuna ya vusirheleri yi vule leswaku yi langutele ku vona Timbhoni ti vuya nakambe ku nga ri khale. Yi te: “A hi si tshama hi vona vanhu lava tikhomaka hi ndlela yoleyo. Mi vanhu lava Xikwembu xi langutelaka leswaku hi va vona.” Ku bumabumela ko tano i xikhutazo xin’wana xa leswaku Vakreste va ntiyiso va ‘hlayisa ku tikhoma lokunene,’ leswaku vanhu ‘va ta dzunisa Xikwembu hikwalaho ka mintirho leyinene leyi va nga timbhoni ta yona to swi vona hi mahlo.’—1 Petro 2:12.