‘Dyondzisa Jaha’

LESWAKU swilo leswi byariweke entangeni swi kula kahle, ku laveka leswi engetelekeke ku tlula ku haxa mbewu emisaveni kutani u vuya endzhaku ka tin’hweti to karhi u ta tshovela. Ku laveka ku tirha hi matimba leswaku u lunghiselela misava, u byala mbewu u tlhela u cheleta ivi u hlakulela swimilana leswaku swi ta kula ku fikela loko swi tshoveriwa.

Endlelo leri ri wu hlamusela kahle ntiyiso wa Swivuriso 22:6, leyi nge: “Dyonḍisa džaha e ndleleni leyi a fanelaka ku famba ha yona; ni loko a dyuhele a nga ka a nga hambuki.” Hakunene, ndzetelo wa mutswari i xilo xa nkoka eku kuriseni ka n’wana hi ndlela leyi humelelaka.

Hambiswiritano, emisaveni ya namuntlha ya vutilawuri vatswari vo tala va tsandzeka ku landzela ndzayo leyi. Loko va landzela vutlhari lebyi tolovelekeke bya leswaku vana va fanele va dyondza ku lulamisa swiphiqo hi voxe, hakanyingi vana va vona va tshikiwa va swi lunghisa hi voxe. Mukhuva wo tano wu endla leswaku vantshwa va hlaseriwa hi ku olova hi nkucetelo wo biha wa vanhu lava nga riki na mahanyelo lamanene ni vo homboloka.—Swivuriso 13:20.

Swa antswa swonghasi leswaku vatswari va dyondzisa vana va vona va ha ri vatsongo misinya ya milawu ya Vukreste hi ku phindha-phindha, va tirhisa ndzetelo wa Xikwembu! Xana va fanele va va ni malembe mangani? Muapostola Pawulo u ri: ‘Ku sukela loko va ha ri tincece.’ A swi ri tano hi jaha Timotiya. Mana wakwe Yunisi ni kokwa wakwe wa xisati Luwisa va dyondzise Timotiya “matsalwa yo kwetsima” hi ku phindha-phindha leswaku a ‘dyondza’ naswona a ‘susumeteleka ku ma pfumela.’ Vuyelo byi ve byihi? Ndzetelo wo tano wu n’wi pfune swinene leswaku a ‘tlhariha hi leswaku a ta pona.’—2 Timotiya 1:5; 3:14, 15.

Hilaha ku fanaka ni namuntlha, vatswari lava nga ‘tshikiki ku endla leswi nga swinene,’ va ta tshovela hakelo leyi fuweke loko ‘va nga karhali.’ (Vagalatiya 6:9) Hosi leyi tlhariheke Solomoni yi te: “Tata wa l’a lulameke o ta ṭaka ngopfu.”—Swivuriso 23:24.