“A Ndzi Wu Twa Moya Wa Ku Rhula”

WANUNA wa le Jarimani u ye entsombanweni lowu lunghiseleriweke hi Timbhoni ta Yehovha leswaku a ta va “nhlori” eka Timbhoni. Hikwalaho ka yini? Pakani ya yena a ku ri ku “paluxa mpambukwa lowu kutani a ponisa vanghana vakwe leswaku va nga hambuki.” Endzhaku ko va kona entsombanweni lowu, u tsalele vanghana vakwe papila leri landzelaka:

“Loko ndzi tshinela laha ntsombano wu nga khomiwa kona, ndzi tivutisile loko ku ri yona ndhawu ya kona. A ku nga vonaki munhu ehandle, a ku nga ri na thyaka kumbe mathini ya byala lama lahleriweke ehansi. Loko ndzi ri karhi ndzi tshinela, ndzi vone vavanuna vambirhi egedeni ya xitediyamu. Va ndzi pfuxerile kutani va ndzi pfumelela ku nghena.

“A ndzi langutele ku twa huwa eka vanhu va magidi lava a va ri kona, kambe a ku miyele ngopfu. Ndzi ehleketile ndzi ku: ‘Kumbexana ku na vanhu va nga ri vangani lava tshameke hi ku hangalaka.’

“Loko ndzi nghena, hi ku hatlisa nyingiso wa mina wu kokiwe hi drama leyi a yi ri karhi yi tlangiwa exitejini. Ndzi swi vone endzhaku leswaku xitediyamu a xi tele swinene hi vayingiseri va magidi lava rhiyeke ndleve. A ndzi wu twa moya wa ku rhula. Leswi ndzi swi tweke, ndzi swi voneke ni ndlela leyi ndzi titweke ha yona hi nkarhi lowu a wu sele wa ntsombano, swi ndzi khumbe swinene.

“Loko ndzi ri exikarhi ka Timbhoni, ndzi xiye swikandza leswi tsakeke ni leswi kombisaka rirhandzu. Hi xitshuketa, a ndzi nga swi koti ku bakanya mianakanyo ya leswaku, ‘Lava i vanhu va Xikwembu hakunene!’”

Ematshan’weni ya ku ‘ponisa vanghana va rona leswaku va nga hambuki,’ jaha leri ri va kombele leswaku va dyondza Bibele na rona. Vuyelo byi ve byihi? Namuntlha i nkulu wa Mukreste. Yena ni ndyangu wakwe va hiseka eka rin’wana ra mavandlha lama vulavulaka Xijarimani eZurich, le Switzerland.