Vito Ra Xikwembu Ri Vuyiseriwa

“ENDZHAKU ko va vito leri nge Yehovha ri susiwile eTibibeleni malembe kumbexana malembe-xidzana yo tala, timbhoni takwe ta manguva lawa hi byona vukhongeri ntsena bya Vukreste lebyi nga teka goza ra ku tlherisela tetragrammaton.”a

Marito lama nga laha henhla ma huma eka buku leyi vuriwaka Jeová dentro do judaísmo e do cristianismo (Yehovha eVuyudeni Ni Le Vukresteni), leyi tsariweke hi mutsari wa le Brazil, Assis Brasil. Kambe, hambileswi vuhundzuluxeri byi nga ri byingani bya Bibele byi tirhiseke vito ra Xikwembu hi ndlela yo karhi, ku nga ha tlakuka xivutiso xa leswaku hikwalaho ka yini vukhongeri byin’wana byi ri susile eTibibeleni ta byona? Brasil u ri: “Vito ra Xikwembu ri nga ha va ri susiwe hikwalaho ka vukholwa-hava . . . , minsusumeto leyi hundzeletiweke, kumbe ku navela ku tlakusa vito ra Yesu ni ra mana wakwe, Mariya.”

Hambiswiritano, hilaha Nkul. Brasil a boxaka ha kona hi ku kongoma: “Ku susiwa ka vito [ra Xikwembu] ku lulamisiwe hi ku helela hi Xiputukezi eka New World Translation of the Holy Scriptures.” Njhani? Hikuva vito ra Yehovha ri vuyiseriwe endhawini ya rona leyi faneleke eBibeleni yoleyo. Vito leri nge Yehovha ri humelela minkarhi yo tlula 7 200 eka New World Translation.

Ku sukela loko byi humesiwile ro sungula, ku hangalasiwe tikopi to tlula timiliyoni ta tsevu na hafu hi Xiputukezi ta vuhundzuluxeri lebyi bya manguva lawa, lebyi kongomeke. Xisweswo mutsari wa phepha-hungu, loko a tsala eka phepha-hungu ra le Brazil leri vuriwaka Diário do Nordeste (Phepha-hungu Ra Siku Na Siku Ra Le N’walungu-vuxa) u boheke ku tlakusa xivutiso lexi, “Xana a wu swi tiva leswaku Xikwembu xi na vito?” Hikwalaho ka vuhundzuluxeri lebyi bya manguva lawa bya Bibele, vanhu va timiliyoni sweswi va nga hlamula va ku, “Ina. Vito ra Xikwembu i Yehovha.”

[Nhlamuselo ya le hansi]