Valawuri Va Ndhundhuzela Timbhoni

LE Cádiz, eSpain, doroba leri nga hlaluko leri kumekaka eka mpfhuka wa tikhilomitara ta 500 edzonga-vupela-dyambu bya Madrid, meyara Doña Teófila Martínez u nyike Timbhoni ta Yehovha beji yo kombisa ku xixima (leyi xifaniso xa yona xi nga laha henhla). Yi hlayeka hi ndlela leyi: “Va ka masipala edorobeni ra Cádiz va tlangela Timbhoni ta Yehovha hi ntirhisano ni matshalatshala ya tona edorobeni leri.” Xana i yini leswi Timbhoni ta Yehovha ti swi endleke lerova ti fundzhiwa hi ndlela leyi?

Timbhoni ti fundzhiwe hileswi ti lunghiseke xiphemu xa xitediyamu xa ka masipala wa doroba. Hi mahelo-vhiki yo hlaya, Timbhoni ta madzana-dzana ti tinyiketele hi ku tirhandzela ti lunghisa swihambukelo swa xithezi xa le hansi xa xitediyamu xa bolo ya milenge xa le Carranza. Sweswi, hinkwavo lava tirhisaka xitediyamu lexi va kota ku nwa mati ni ku tirhisa swihambukelo ni fuloro leyi lunghisiweke.

Timbhoni ta Yehovha ti ve ni vuxaka lebyinene ni doroba ra Cádiz nkarhi wo leha. Lembe rin’wana ni rin’wana masipala wa doroba u tsakela ku nyika Timbhoni Xitediyamu xa Carranza leswaku ti xi tirhisela ntsombano wa tona wa lembe ni lembe. Hikokwalaho, Timbhoni ti tsakela ku endla leswi ti nga swi kotaka leswaku xitediyamu xi tshama xi ri lexi langutekaka.

Hambiswiritano, ku engetela entirhweni wa mavoko, nkarhi na nkarhi Timbhoni ta Yehovha ti endzela miganga ya le dorobeni leswaku ti pfuna vanhu hi ndlela yin’wana. Ti huwelela “mahungu lamanene” ya Mfumo wa Xikwembu. Entiyisweni, vutirheli bya tona bya le rivaleni a ti byi endleli ku dzunisiwa hi vanhu. Ti byi endla hi ku yingisa xileriso xa Yesu xa ku chumayela ‘mahungu lamanene ya mfumo’ ni ku “endla vanhu va matiko hinkwawo va va vadyondzisiwa.” (Matewu 24:14; 28:19) Hi ndlela leyi, Timbhoni ta Yehovha ti tshemba leswaku ti ta pfuna vanhu hi ku va dyondzisa ‘ndlela ya ku lulama.’—Swivuriso 12:28.