“Ku Tipeta eLwandle Leri Kariheke”

XANA a wu nga ta teka xiendlo xo tano tanihi lexi nga kunguhateriwangiki kahle, xa vuhunguki ni lexi nga ni khombo? Hambiswiritano, vanhu van’wana va tihoxa exiyin’weni xo tano hi ndlela yo fanekisela. Hi ndlela yihi? Thomas Fuller, mutsari wa Munghezi wa lembe-xidzana ra vu-17 u te: “U nga endli nchumu loko u hlundzukile. Swa fana ni ku tipeta elwandle leri kariheke.”

Ku teka goza ro karhi loko u hlundzuke hi ndlela leyi nga lawulekiki ku nga ha va ni vuyelo byo biha. Leswi swi kombisiwe kahle hi xiendlakalo lexi kumekaka eBibeleni. Simiyoni na Levhi vana va kokwana wa khale wa matsalwa Yakobe, hi ku hlundzuka va teke goza ra ku tirihisela hikwalaho ka leswi a ku pfinyiwe makwavo wa xisati Dina. Vuyelo bya kona a ku ri ku dlayiwa ka vanhu vo tala ni ku phangiwa ka nhundzu. A swi hlamarisi leswi Yakobe a soleke xiendlo xa vona xo biha a ku: “Mi nḍi dyisa mbiṭi, mi nḍi endle riv̌engo e ka v̌aaki v̌a tiko leri.”—Genesa 34:25-30.

Hi vutlhari, Rito ra Xikwembu ku nga Bibele, ri khutaza ku teka ndlela leyi hambaneke ni leyi. Ri ri: “Ṭhika ku kariha, u fularela ku lev̌a; u nga hlunḍuki, ŝi nga ku dyohisa ntsena.” (Pisalema 37:8) Ku landzela xitsundzuxo lexi ku nga sivela swidyoho leswikulu.—Eklesiasta 10:4; nakambe vona Swivuriso 22:24, 25.