Ku Hlula Vubihi

“HA YINI mbyana leyi yi feke yi fanele yi rhuketela hosi yanga leyi nga mufumi? Ndzi kombela ku famba ndzi ya tsema nhloko ya yona.” Loyi a endleke xikombelo lexi a ku ri Abixayi, Muisrayele loyi a a ri ndhuna ya vuthu. A ku ri n’wangulo wakwe lowu kombisaka ku hlundzuka loko hosi yakwe, Hosi Davhida, a rhukaniwa hi ndlela ya rivengo hi Ximeyi lowa ka Benjamini.—2 Samuwele 16:5-9, NW.

Abixayi a a pfumelelana ni vonelo leri tolovelekeke namuntlha—vonelo ra ku timela ndzilo hi ndzilo. Ina, Abixayi a a lava leswaku Ximeyi a twa ku vava hikwalaho ka ndzhukano lowu a rhukaneke Davhida ha wona.

Kambe, Davhida u angurise ku yini? Davhida u sivele Abixayi, a ku: “Ṅwi ṭhikeni.” Hambileswi a a nga ri na nandzu eka swihehlo leswi a a hehliwa hi swona hi Ximeyi, hi ku titsongahata Davhida u honise ndzingo wa leswaku a tirihisela. Ematshan’weni ya sweswo, u siye mhaka leyi emavokweni ya Yehovha.—2 Samuwele 16:10-13.

Loko Davhida a tlhela a tshama exiluvelweni endzhaku ko balekela ku pfukeriwa loku nga humelelangiki hi n’wana wakwe, un’wana wa vanhu vo sungula ku n’wi amukela ni ku kombela ku rivaleriwa a ku ri Ximeyi. Abixayi u tlhele a lava ku n’wi dlaya, kambe Davhida u n’wi siverile nakambe.—2 Samuwele 19:15-23.

Emhakeni leyi, Davhida u tikombise a ri la fanelekaka ku fanekisela Yesu Kreste, loyi muapostola Petro a tsaleke leswi ha yena: “Loko a tseketseriwa, a nga tlheriselanga hi ku tseketsela . . . kambe u hambete a tinyiketa eka loyi a avanyisaka hi ku lulama.”—1 Petro 2:23.

Namuntlha, Vakreste va tsundzuxiwa ku “titsongahata emianakanyweni, [va] nga tlheriseli swo biha hi swo biha.” (1 Petro 3:8, 9) Hi ku landzela xikombiso lexi vekiweke hi Davhida na Yesu Kreste, na hina hi nga ‘hambeta hi hlula swo biha hi leswinene.’—Varhoma 12:17-21.