Vutlhari Bya Ku “Swi Vona Ka Ha Ri eMahlweni Leswi Nga Ta Humelela”
“IVANHU lava lahlekeriweke hi mianakanyo ya vona leyinene naswona va pfumala ku twisisa. Loko a va tlharihile, a va ta twisisa swilo leswi kutani va swi vona ka ha ri emahlweni leswi nga ta humelela.”—Deteronoma 32:28, 29, Beck.
Marito lawa ma vuriwe hi Muxe a byela Vaisrayele loko va yime endzilakanini wa Tiko leri Tshembisiweke. Muxe a a vula ka ha ri emahlweni nkarhi lowu va nga ta fularhela Yehovha kutani va nga byi anakanyi nikatsongo vuyelo bya swiendlo swa vona. Eka malembe-xidzana lama landzeleke, vanhu va Israyele—ku katsa ni tihosi to tala—va swi honisile switsundzuxo swa Xikwembu.
Hi xikombiso, Solomoni a a xi tiva xileriso xa Xikwembu xa leswaku va nga tekani ni vagandzeri va swikwembu swin’wana loko ku nga ri Yehovha. (Deteronoma 7:1-4) Nilokoswiritano, u ve ni “v̌av̌asati la’v̌o tala v̌a matiko maṅwana.” Vuyelo byi ve byihi? Rungula ra Bibele ri ri: “Kute loko Salomon a dyuhele, v̌asati v̌a yena v̌a hambukisa mbilu ya yena yi lanḍa ŝikwembu ŝiṅwana; kutani mbilu ya yena yi nga ha ri hikwayo e ka Yehova, Šikwembu ša yena, kukotisa mbilu ya Davida, tata wa yena.” (1 Tihosi 11:1, 4) Hambileswi a a ri munhu la tlhariheke, Solomoni a a nga ri na yona mianakanyo leyinene ya ku “swi vona ka ha ri emahlweni leswi nga ta humelela” loko a nga xi yingisi xileriso xa Xikwembu.
Ku vuriwa yini hi hina? Hi nga ha papalata maxangu lamakulu hi ku swi anakanyisisa kahle ka ha ri emahlweni swiboho swa vutomi. Hi xikombiso, Vakreste va tsundzuxiwa leswaku va “[tibasisa] eka swilo hinkwaswo leswi nyamisaka nyama ni moya.” (2 Vakorinto 7:1) Leswi i vutlhari, kambe vanhu vo tala va pfumala mianakanyo leyinene ya ku swi vona ka ha ri emahlweni leswi nga ta humelela loko va honisa ndzayo ya Pawulo. Hi xikombiso, vantshwa vo tala va thyakise mimiri ya vona hi ku dzaha fole, va ehleketa leswaku ri va endla va languteka va ri ni vutivi ni ku va vanhu lavakulu. Swi khomisa gome swonghasi loko endzhaku, vo tala va vona va va ni vuvabyi bya mbilu, vuvabyi bya khensa ya mahahu kumbe va nga ha swi koti ku hefemula kahle hikwalaho ka swona!
I swa nkoka ku anakanyisisa swinene hi vuyelo bya swiboho ni swiendlo swa hina. Hikwalaho ka xivangelo lexi twalaka, Pawulo u tsarile a ku: “Xin’wana ni xin’wana lexi munhu a xi byalaka, u ta tlhela a tshovela xona; hikuva loyi a byalelaka nyama ya yena u ta tshovela ku onhaka enyameni yakwe, kambe loyi a byalelaka moya u ta tshovela vutomi lebyi nga heriki emoyeni.”—Vagalatiya 6:7, 8.