Nkongomiso Wa Ku Hlawula Vanghana Lavanene

XIVIKO xa Reader’s Digest xi vula leswaku vana va lava nkongomiso malunghana ni swiambalo ni vuyimbeleri eka tintangha ta vona ku nga ri eka vatswari va vona. Xisweswo i swa nkoka leswaku vatswari va tiva vanhu lava vana va tolovelaneke na vona ni lomu va nga kona.

Esmé van Rensburg, mudyondzisi-nkulu wa ndzawulo ya ntivo-miehleketo eyunivhesiti ya le Afrika Dzonga u ri, “I vutihlamuleri bya wena leswaku u kambisisa.” U engetela a ku: “Swi nga endleka leswaku n’wana wa wena a ku hlundzukela, kambe u ta tlhela a ku tsakela.” Kutani u nyika swiringanyeto leswi eka vatswari. Milawu yi fanele yi va leyi twisisekaka naswona yi ri leyi sekeriweke eka misinya ya milawu yo karhi; yingisela n’wana wa wena; u nga hundzeleti swilo kambe tshama u rhurile naswona u tiva leswi u lavaka ku swi vula. Loko n’wana wa wena a endle xinghana ni munhu loyi a nga lulamangiki, kokela nyingiso eka mukhuva lowu nga amukelekiki lowu vunghana lebyi byi wu vangeke ku ri ni ku sivela leswaku vunghana byi ya emahlweni.

I khale Rito ra Xikwembu, ku nga Bibele ri tamele ndzayo leyi twisisekaka eka vatswari. Hi xikombiso, ri ri: “Hatlisa emhakeni yo twa, [u] nonoka emhakeni yo vulavula, [u] nonoka emhakeni ya vukarhi.” (Yakobo 1:19) Matsalwa ma tlhela ma nyika ndzayo leyi leyinene emhakeni ya ku hlawula vanghana, leyi nge: “L’a fambaka ni tintlhari o ta tlhariha, kambe l’a tolov̌elaka ŝihunguki o ta onhaka.” (Swivuriso 13:20) Swikombiso leswi swi kombisa vutlhari lebyi kumiwaka hi lava va hlayaka Bibele hi ku yi tlangela va tlhela va tirhisa leswi yi swi vulaka evuton’wini bya vona bya siku ni siku.