Xihlawu-hlawu Ni Vukhongeri

“LOKO ndzi ta eUnited States hi 1978, a ndzi tshemba leswaku Amerika i khale ri tlhantlhe swiphiqo swa rona swa xihlawu-hlawu, a ndzi ku vantima a va fana ni vaaki lavan’wana,” ku vula Mark Mathabane, mutsari wa le Afrika Dzonga, loko a vulavurisana ni va magazini wa Time. “Sweswo ndzi swi vona swi ri ntiyiso hi tindlela to tala. United States a yi tikomba yi yi tlula swinene Afrika Dzonga. Kutani lexi ndzi hlamariseke, ndzi kume leswaku timbilu ta vanhu a ti hundzukanga ngopfu.” I yini lexi endleke leswaku a xiya swilo sweswo leswi n’wi hlamariseke?

Mathabane u te: “Yin’wana ya tiawara ta xihlawuhlawu lexikulu eAmerika i 11 a.m. hi Sonto.” U xiye leswaku hambi ku ri ekerekeni, vanhu a va swi lavi ku gandzela ni lava va tinxaka tin’wana. U vutisile a ku: “Xana va titwa njhani hi masiku laman’wana ya vhiki?” Loko a vulavula hi dyondzo leswaku hi yona yi vangelaka ku hundzuka, Mathabane u te: “Dyondzo yi ku endla u amukela ku ringana ka vanhu hinkwavo.”

Timbhoni ta Yehovha ta pfumela leswaku dyondzo hi yona ntlhantlho wa kona, kambe ngopfu-ngopfu ti bumabumela dyondzo leyi sekeriweke eRitweni ra Xikwembu. Ina, Bibele yi ti pfuna ku herisa swihinga swa xihlawu-hlawu xa rixaka—hambi ku ri ematikweni lawa ku vengiwa ka tinxaka ku tinyikeke matimba. Vhiki na vhiki eTiholweni ta vona ta Mfumo, vanhu va tinxaka-nxaka ni va matiko yo hambana-hambana va hlengeletana leswaku va dyondzisiwa milawu ni misinya ya milawu ya Rito ra Xikwembu, ku nga Bibele. A ku humesiwi minhlengo eminhlanganweni leyi. Wa amukeleka leswaku u va kona!