A Ti “Chava Xikwembu Xa Ntiyiso”
LOKO Vaisrayele va ha ri evuhlongeni aEgipta, tisungukati ta Vaheveru, ku nga Xifira na Puwa a ti nyikiwe ntirho wo tika. Loko va ringeta ku hunguta nhlayo ya vanhu vambe lava a va engeteleka swinene, Faro u lerise vavasati lava a ku: “Loko mi pfuna vavasati va Vaheveru ku veleka . . . , loko ku ri n’wana wa jaha mi fanele mi n’wi dlaya.”—Eksoda 1:15, 16, NW.
Xifira na Puwa a va “chava Xikwembu xa ntiyiso,” kutani va ve ni ntiya-nhlana, a va “endlanga hilaha hosi ya Egipta yi [va] byeleke hakona.” Ku ri na sweswo, va tshike vana va vafana va hanya, hambileswi ntiya-nhlana wolowo a wu ta va hoxa ekhombyeni. Yehovha u “tirhisan[e] kahle ni tisungukati,” kutani a ti hakela hikwalaho ka ku ponisa ka tona vutomi.—Eksoda 1:17-21, NW.
Mhaka leyi yi kandziyisa ku tlangela ka Yehovha lava va n’wi tirhelaka. Leswi swi endliweke hi Xifira na Puwa a a ta va a swi langute tanihi vumunhu, hambileswi a swi lava xivindzi. Phela, a ku na wansati la hanyeke kahle la nga dlayetelaka tincece! Hambiswiritano, handle ko kanakana Yehovha u yi tekele enhlokweni mhaka ya leswaku vanhu van’wana, hikwalaho ka ku chava vanhu, va endle swilo leswi tsemaka nhlana. A a swi tiva leswaku tisungukati leti a ti nga susumetiwi hi musa wa vumunhu ntsena, kambe ni hi ku chava Xikwembu ni ku tinyiketela eka xona.
Wa nga vona ndlela leyi hi nga tlangelaka ha yona hi ku va hi tirhela Xikwembu lexi xiyaka swiendlo swa hina swa vutshembeki! I ntiyiso, swi nga ha endleka a nga ri kona eka hina loyi a tshameke a langutana ni ndzingo wa ripfumelo lowu a wu langutane na Xifira na Puwa. Kambe, loko hi yima hi tiyile eka leswi lulameke—ku nga ha va exikolweni, endhawini leyi hi tirhelaka eka yona, kumbe kun’wana—Yehovha a nga ri honisi rirhandzu ra hina leri tshembekaka. Ku hambana ni sweswo, i “muhakeri wa lava va [n’wi] lavaka hi mbilu hinkwayo.” (Vaheveru 11:6) Ina, “Xikwembu a xi pfumali ku lulama lerova xi nga rivala ntirho wa n’wina ni rirhandzu leri mi ri kombiseke hikwalaho ka vito ra xona, hileswi mi tirheleke vakwetsimi naswona ma ha ya emahlweni mi va tirhela.”—Vaheveru 6:10.