“Xivindzi Lexi Susumetiwaka Hi Ripfumelo”

HI LEMBE ra 1998 hi vone ku humesiwa ka buku leyintshwa hi Xifurwa leyi xopaxopaka swinene, leyi nge Les Témoins de Jéhovah face à Hitler! (Timbhoni Ta Yehovha eMahlweni Ka Hitler), leyi tsariweke hi Guy Canonici. Eka manghenelo yakwe eka buku leyi, n’wamatimu la xiximekaka swinene wa Mufurwa François Bédarida, u tsarile: “Leyi i buku leyi amukelekaka swinene. A hi leswi yi vikaka timhaka leti siyiweke ntsena, kambe hileswi yi fikeke hi nkarhi lowunene. . . . Handle ka vatshila, xana i vamani lava a va tiva hi makumu ya Timbhoni ta Yehovha eka Mfumo lowu wa Vunharhu? Kambe hi malembe ya 12 ya mfumo lowu, ti xanisiwile hi tihanyi letikulu. Ti tlhele ti langutana ni nhlomulo wa le tikampeni ta nxaniso. Na tona ti vone maxangu lamakulu swinene hikwalaho ka ripfumelo ni ku tiyisela ka tona. Hikwalaho ka yini Vakreste lava va rivariwile ematin’wini? . . .

“Xana hikwalaho ka yini ntlawa lowu wutsongo wa vukhongeri, lowu hangalakeke ni lowu nga riki na khombo, wu khomiwe hi tihanyi ta muxaka lowu? Lexi hi xona lexi hlamarisaka swinene. Timbhoni le Jarimani i titsongo swinene eka nhlayo ya vaaka-tiko—nkambisiso wu komba leswaku eka vaaka-tiko vo tlula 60 wa timiliyoni, nhlayo ya tona a ku ri 20 000—kambe hinkwato a ti ri vaaka-tiko lava rhuleke, lava xiximaka nawu naswona a va nga xungeti munhu, a va lava ntsena ku ti tirhela ni ku kurisa vana va vona hi ndlela leyinene. . . .

“Nxaniso lowu wu fike wu kumana ni vapfumeri lava tiyeke emoyeni lava lungheleke ku lwisana ni nhlaselo wa le handle hi ripfumelo ra vona eka Yesu Kreste, nxaniso a wu katsa ku biwa hi maphorisa ya Mfumo—leswi endleke leswaku va va ni vurhena kutani va dlayeriwa ripfumelo ra vona.”

Rungula ra Timbhoni ta Yehovha leti dlaweriweke ripfumelo ra tona ra Vukreste loko ku kanetiwa vukhongeri bya tona, i ra matimba swinene. Empfuxetweni wa buku leyi, murhangeri wa phepha-hungu ra Xifurwa ra Khatoliki leri nge, La Croix, hi ndlela yo sandza u te: “Hambileswi matimu ya vona ma nga tiviwiki ngopfu, Guy Canonici u swi kotile ku hlengeleta vumbhoni bya ntikelo swinene lebyi siyaka munhu a ahlamise nomu loko a vona xivindzi lexi susumetiwaka hi ripfumelo, leswi phofuriweke hi marito yo olova, ripfumelo leri tiyeke ku ya fika emakumu hambi ni le ka vana. Xitsundzuxo lexi xi fanele xi nyikela xisekelo eka njhekanjhekisano lowu nga kona sweswi malunghana ni xiyimo xa Vukreste xa Timbhoni ta Yehovha.”