Ku Tirha Ni Ku Hungasa Hi Ku Ringanisela

“VUHUNGASI byi fana ni nguvu yo saseka, leyi nga hlakalaka loko yi tshamela ku ambariwa.” Mutsari la nga boxiwangiki vito ra yena u wu kombisa kahle nkoka wa vuhungasi hi marito lawa. Hambiswiritano, u kombisa leswaku byi fanele byi ringaniseriwa ni ntirho lowu vuyerisaka.

Mutsari wa Bibele la huhuteriweke, ku nga Solomoni, na yena u vulavule hi mhaka leyi. Hosi leyi yo tlhariha yi vulavule hi swilo swimbirhi leswi faneleke ku papalatiwa. Xo sungula yi te: “Šiphukuphuku ši phuṭa mav̌oko, ši dya nyama ya šiv̌iri [ya] šona.” (Eklesiasta 4:5) Ina, vulolo byi nga vangela munhu vusweti. Hikwalaho, byi nga nghenisa rihanyo, hambi byi ri vutomi bya munhu la lolohaka ekhombyeni. Hi hala tlhelo, ku ni van’wana lava titsonaka swilo swo tala leswaku va endla ntirho wo tika. Solomoni u hlamusele ku tirha ka vona va nga wisi tanihi ‘vuhava ni ku hlongorisa mheho.’—Eklesiasta 4:4.

Hilaha ku twalaka, Solomoni u bumabumele leswaku ku va ni ku ringanisela: “Šandla ši ri šiṅwe le’ši teleke hi ku wisa, ši sasekile ku tlula ŝandla ŝimbiri le’ŝi teleke hi ku karala ni ku lanḍa mheho.” (Eklesiasta 4:6) Munhu u fanele a ‘vona leswinene hikwalaho ka ku tikarhata kakwe’—hi leswaku, u fanele a tolovela ku tinyika nkarhi wa ku tiphina hi leswi a nga na swona. (Eklesiasta 2:24) Nakambe ku fanele ku va ni swilo swin’wana evuton’wini handle ka ntirho wo tihanyisa. Ndyangu wa hina hi fanele hi wu avela nkarhi wun’wana wa hina. Solomoni u kandziyise leswaku ndzhwalo wa hina lowukulu, a hi ntirho wo tihanyisa, kambe i ku tirhela Xikwembu. (Eklesiasta 12:13) Xana u un’wana wa lava va nga ni langutelo lerinene hi ntirho?