Ku Langutana Ni Mintlhontlho Ya Ku Va Mutswari

KU KURISA vana namuntlha, ngopfu-ngopfu va malembe ya kondlo-a-ndzi-dyi, i ntlhontlho lowukulu eka vatswari. The Gazette ya le Montreal, eCanada, yi vika leswaku ku nwa swakunwa swa xihoko ni ku tirhisa swidzidzirisi swi “tolovelekile eka vana va kondlo-a-ndzi-dyi.” Yi kandziyisa leswaku vatswari va ni “vutihlamuleri bya ku xalamukela ku hundzuka ka mahanyelo ya vana va [vona] va kondlo-a-ndzi-dyi.”

I yini leswi vatswari va faneleke va swi xiya leswi nga kombisaka swiphiqo swoleswo swa vana va kondlo-a-ndzi-dyi? Swikombiso swin’wana swa swiphiqo swa miri, mintlhaveko ni ntshamisano leswi hlamuseriweke hi Nhlangano wa le Amerika wa Dyondzo ya Mianakanyo ya Vana swi katsa ku tshamela ku va ni matshimbi, ku cinca ka vumunhu, ku heta nkarhi wo tala u tipfalele endlwini, ku rhandza ku holova ni ku tlula nawu.

Xana vatswari va nga va sirhelela njhani vana va vona eka swilo swo tano leswi nga ni khombo ni vuyelo bya swona lebyo biha? Dok. Jeffrey L. Derevensky, wa le Yunivhesiti ya McGill, u tshemba leswaku ku vulavurisana hi ku ntshunxeka ni ku khutaza ku xiximana loko n’wana a ha ri ntsongo swi nga hunguta swiphiqo leswi vaka kona hi ku famba ka nkarhi. The Gazette yi engetela leswaku hambileswi ku navela ku tilawula hilaha ku engetelekeke ku nga kona emalembeni ya kondlo-a-ndzi-dyi, vana lava va hambeta va lava “nkongomiso, nseketelo, ku kurisiwa kahle ni ku rhandziwa hi vatswari va vona.” Tinhlamuselo leti ti phindha xivuriso xa Bibele lexi nge: “Letela mufana hi ndlela leyi nga yakwe; hambiloko a kurile a nge hambuki eka yona.” (Swivuriso 22:6) Xikwembu xi laya vatswari leswaku va va swikombiso, vanghana, va vulavula ni vana va vona ni ku va dyondzisa.—Deteronoma 6:6, 7.