Loko ‘Timheho Ti Hi Sivela’

Loko a hlamusela swilo leswi humeleleke vadyondzisiwa va Yesu loko va ri karhi va ringeta ku tsemakanya Lwandle ra Galeliya hi byatso, mutsari wa Evhangeli Marka u vula leswaku ‘a swi va nonon’hwela ku tluta, hileswi mheho a yi va sivela.’ Loko a ha ri eribuweni, Yesu u lemuke xiyimo xa vona ivi a famba ehenhla ka lwandle hi singita a ya eka vona. Loko a nghena ebyatsweni lebyi a va ri eka byona mheho yi hungutekile.—Marka 6:48-51.

Mutsari yoloye wa Bibele u vike leswaku emahlweninyana, ‘ku pfuke xidzedze lexikulu.’ Xisweswo Yesu “a tshinya mheho . . . , kutani mheho yi hunguteka, hiloko ku va ni ku rhula lokukulu.”—Marka 4:37-39.

Hambileswi hina namuntlha hi nga swi kotiki ku vona swiendlakalo swoleswo swa masingita, hi nga dyondza swo tala eka swona. Tanihi vanhu lava nga hetisekangiki lava hanyaka eminkarhini leyi nga ni khombo, na hina hi langutana ni timheho ta ku xaniseka. (2 Timotiya 3:1-5) Kahle-kahle, minkarhi yin’wana hi nga vona onge ntshikilelo wa miringo leyi hi langutanaka na yona wu ringana ni xidzedze. Kambe mpfuno wu kona! Yesu u humesa xirhambo lexi: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa.”—Matewu 11:28.

Loko swi vonaka onge ‘timheho ta hi sivela,’ hi nga va ni “ku rhula lokukulu” ka mbilu. Njhani? Hi ku tshemba switshembiso leswi nga tsandzekiki swa Yehovha Xikwembu.—Ringanisa Esaya 55:9-11; Vafilipiya 4:5-7.