Lembe Ro Hlawuleka Ra Ku Hangalasiwa Ka Bibele

KU TLULA rini ni rini, vanhu vo kota sava ra lwandle va ni Bibele. Leswi hi leswi ringanyetiwaka hi Mavandla Lama Hlanganeke Ya Bibele, hikuva ku hangalasiwa ka Bibele hi 1998 ku tlakuke ku va ehenhla ka hafu ya miliyoni ku tlula lembe leri hundzeke. Hi ku angarhela, ku tlula 585 000 000 wa Tibibele—leti heleleke kumbe hi swiphemu—ti hangalasiwile exirhendzevutaneni xa misava. Xiviko xi te: “Leswi swa khutaza. Vanhu vo tala va karhi va fikeleriwa hi Rito ra Xikwembu namuntlha.”

Kunene, ku ni ku hambana exikarhi ko va ni Bibele ni ku yi hlaya. Hi xikombiso, nkambisiso wun’wana wu kombise leswaku ku tlula 90 wa tiphesente ta Maamerika ma ni Bibele naswona ma pfumela leswaku Bibele i xihlovo lexinene xo dyondzisa mahanyelo lamanene. Hambiswiritano, i vanhu va 59 wa tiphesente ntsena lava vuleke leswaku va ya eBibeleni leswaku va kuma xitsundzuxo. Naswona 29 wa tiphesete va vule leswaku “a va yi [tolovelanga] ngopfu,” kumbe “a hi munghana wa vona” Bibele.

Timbhoni ta Yehovha a to kandziyisa ni ku hangalasa Tibibele ntsena, kambe ti tlhela ti fambisa tidyondzo ta mahala ta le kaya ta Bibele ni vanhu ematikweni lama tlulaka 230. Vanhu va timiliyoni emisaveni hinkwayo namuntlha va vuyeriwa eka nongonoko lowu wo dyondzisa Bibele. Va pfuniwa leswaku va langutana ni swiphiqo leswi va nga na swona sweswi, naswona va dyondza hi leswi Bibele yi swi vulaka hi vumundzuku lebyi vangamaka ehansi ka Mfumo wa Xikwembu.—Esaya 48:17, 18; Matewu 6:9, 10.

[Swifaniso leswi nga eka tluka 32]

Tidyondzo ta le kaya ta Bibele le (ku suka ehenhla eximatsini) Bolivia, Ghana, Sri Lanka na Nghilandhi