Vanhu—Xana I Swiharhi Swa Xiyimo Xa Le Henhla?

“Xana swi ni mhaka leswaku hi pfumela yini malunghana ni masungulo ya vutomi?”

Nhwanyana wa malembe ya 16 hi vukhale wa le Brazil u vutise xivutiso lexi exinghenisweni xa yena xa rungula leri nga ni nhloko-mhaka leyi nge, “Vanhu—Xana I Swiharhi Swa Xiyimo Xa Le Henhla?” Mudyondzisi wa yena u n’wi kombele ku bula ni vadyondzi-kulobye hi xivutiso lexi, endzhaku ka loko mudyondzisi loyi a kume nkandziyiso wa June 22, 1998 (Hi Xitsonga i wa July 8, 1998), wa Xalamuka! lowu vulavulaka hi mhaka yoleyo.

Mbhoni leyi ya ha riki muntshwa yi kandziyise ndlela leyi dyondzo ya hundzuluko ya ku lwela ku hanya yi nga ni khombo ha yona. Hi xikombiso, vanhu vo tala va vona onge dyondzo ya hundzuluko yi vange leswaku van’wana va languta nyimpi yi ri nchumu wa ntumbuluko wa ku lwela ku hanya, yi pfula ndlela ya ku kula ka Vufasisi ni Vunazi.

Xichudeni lexi xi kombise leswaku ku ni mukhandlu lowukulu exikarhi ka vanhu ni swiharhi. Xi te: “I vanhu ntsena lava nga vaka ni vumoya. I vanhu ntsena lava ringetaka ku kuma nhlamuselo ni xikongomelo xa vutomi. I vanhu ntsena lava karhatiwaka hi rifu, va karhatekaka hi masungulo ya vona naswona va nga ni ku navela ku hanya hilaha ku nga heriki. I swa nkoka hakunene leswaku hi heta nkarhi hi ri karhi hi kambisisa leswi engetelekeke malunghana ni masungulo ya hina!”

Mudyondzisi u bumabumele rungula leri lerinene. U vule leswaku rungula leri i rinene hikwalaho ka leswi Mbhoni leyi ya ha riki emalembeni ya kondlo-a-ndzi-dyi yi rhandzaka ku hlaya. Exikolweni nhwanyana loyi u tiviwa hi ku va muhlayi la tinyiketeleke wa tibuku leti sekeriweke eBibeleni to tanihi Xalamuka! na Xihondzo xo Rindza.

Timbhoni ta Yehovha ti karhatiwa swinene hi vuyelo lebyi dyondzo ya hundzuluko yi nga na byona etimbilwini ni le mianakanyweni ya vantshwa. Hikwalaho ka sweswo, vandlha leri nhwanyana loyi a hlanganyelaka eka rona ri khutaze Timbhoni leti ta ha riki vantshwa leswaku ti nyika vadyondzisi va tona ni vadyondzi-kulobye kopi ya magazini wa Xalamuka! ya June 22, 1998. Ku fambisiwe timagazini ta kwalomu ka 230 eswikolweni swo hambana-hambana edorobeni rolero. Nhloko ya Ndzawulo ya Sayense ya le xikolweni xin’wana yi endle xikhokhelo xa magazini wa Xalamuka!

Ina, swi ni mhaka leswaku hi pfumela yini malunghana ni masungulo ya vutomi! Muntshwa loyi swin’we ni vanghana va yena va kombise leswaku ku pfumela eka Muvumbi swi byi khumbe swinene vutomi bya vona.