Leswi Swi N’wi Kumbukisaka Doroba Ra New York

KU SUKELA hi va-1950, mfungho lowu nga laha henhla wu vekiwe laha wu vonakaka kahle eka yin’wana ya miako ya fektri ya Sosayiti ya Watchtower eBrooklyn, le New York. Vanhu lava tleketliwaka siku ni siku, vavalangi ni vahundzi van’wana va ndlela, va tsundzuxiwa ku hlaya Bibele siku ni siku. Papila leri landzelaka, leri amukeriweke ri huma eka xinhwanyetana lexi nga Mbhoni, ri kombisa ndlela leyi xitsundzuxo lexi xi tirhaka ha yona.

“A ndzi ri karhi ndzi bula ni xichudeni-kulorhi hi leswi ndzi lavaka ku swi endla loko ndzi hete xikolo xa le henhla. Loko ndzi sungula ku vulavula hi Bethele, ku nga yindlu-nkulu ya Timbhoni ta Yehovha, swi n’wi tsakisile. U ndzi byele leswaku u tshame eDoroba-nkulu ra New York ku fikela va rhurha. Ndyangu wa ka vona a wu nga byi landzeleli ngopfu vukhongeri, kambe mixo wun’wana ni wun’wana loko a languta ehandle hi fasitere, a ku ri ni mfungho lowu a wu ku ‘Hlaya Rito Ra Xikwembu Ku Nga Bibele Yo Kwetsima, Siku ni Siku.’ Kutani siku ni siku a a hlaya Bibele ya yena a nga si ya exikolweni.

“Endzhaku ko rhurha edoroba-nkulu leri, u vula leswaku nchumu lowu a wu hulukelaka hi Doroba-nkulu ra New York hi leswaku loko a pfuka, a nga ha xi voni xitsundzuxo xa leswaku a hlaya Bibele yakwe. Kambe hikwalaho ka mfungho lowu nga eka muako wa Watchtower, u titolovete ku hlaya Bibele, kutani u ya emahlweni a hlaya Bibele siku ni siku!”

A ku na lexi antswaka ku tlula ku sungula siku hi ku hlaya xiphemu xa Rito ra Xikwembu! Hi ku endla tano, a swi kanakanisi leswaku u ta tlangela marito ya muapostola Pawulo, lama nge: “Matsalwa yo kwetsima . . . ma swi [kota] ku ku tlharihisa leswaku u ta pona hi ripfumelo mayelana na Kreste Yesu.”—2 Timotiya 3:15-17.