“Ndzi Ta Rhendzeleka eAlitarini Ya Wena, Wena Yehovha”

“NDZI ta hlamba mavoko ya mina hi ku pfumala nandzu, ndzi ta rhendzeleka ealitarini ya wena, Wena Yehovha.” (Pisalema 26:6) Hosi Davhida wa khale u kombise ku tinyiketela ka yena eka Yehovha hi marito lawa. Kambe, hikwalaho ka yini a a ta “rhendzeleka” ealitarini ya Yehovha, naswona a a ta rhendzeleka hi ndlela yihi?

Eka Davhida ndhawu yo gandzela Yehovha, a ku ri etabernakeleni leyi nga ni koporo leyi funengeteke alitari ya switlhavelo, leyi hi nkarhi wa ku fuma ka yena a yi ri eGibiyoni, en’walungwini wa Yerusalema. (1 Tihosi 3:4) Tempele a yi ri kwalomu ka 2,2 wa timitara ematlhelo hinkwawo, a yi ri yitsongo ngopfu eka alitari leyikulu leyi a yi ta akiwa exivaveni xa tempele ya Solomoni.a Hambiswiritano, Davhida a a yi tsakela swinene tabernakela ni alitari ya yona, leyi a yi ri tsindza wa vugandzeri lebyi tengeke eIsrayele.—Pisalema 26:8.

Magandzelo yo hisiwa, switlhavelo swa xinakulobye ni magandzelo yo riha a swi endliwa ealitarini, naswona Siku ro Kombela ku Rivaleriwa ra lembe na lembe a ri kandziyisa switlhavelo leswi a swi endliwa hikwalaho ka tiko. Alitari ni switlhavelo swa yona swi vula swo karhi eka Vakreste namuntlha. Muapostola Pawulo u hlamusele leswaku alitari yi yimela ku rhandza ka Xikwembu, hi ku ya hilaha xi amukeleke xitlhavelo lexi fanelaka leswaku xi kutsula vanhu. Pawulo u te: “Hi ‘ku rhandza’ loku vuriweke, hi kwetsimisiwile hi ku nyiketiwa ka miri wa Yesu Kreste kan’we swi helela kwalaho.”—Vaheveru 10:5-10.

Loko vaprista se va ta sungula ku tirha ealitarini, hi ntolovelo a va hlamba mavoko ematini leswaku va tibasisa. Kutani hilaha ku faneleke, Hosi Davhida u hlambe mavoko “hi ku pfumala nandzu,” loko a nga si ‘rhendzeleka ealitarini.’ U endle “hi mbilu leyi tshembekeke ni hi vululami.” (1 Tihosi 9:4) Loko a nga hlambanga mavoko ya yena hi ndlela leyi, vugandzeri bya yena—ku nga ku “rhendzeleka ealitarini”—a byi nga ta amukeleka. Ina, Davhida a a nga ri Mulevhi naswona a a nga ri na lunghelo ro endla ntirho wa vuprista ealitarini. Hambileswi a ri hosi, a a nga pfumeleriwi ku nghena hambi ku ri exivaveni xa tabernakela. Hambiswiritano, tanihi Muisrayele la tshembekeke u yingise Nawu wa Muxe naswona nkarhi na nkarhi u tise switlhavelo swakwe leswaku a ta nyikela ealitarini. U rhendzeleke ealitarini hi leswi a dzikise vutomi bya yena evugandzerini byo tenga.

Xana na hina hi nga landzela xikombiso xa Davhida namuntlha? Ina. Na hina hi nga hlamba mavoko ya hina hi ku pfumala nandzu ivi hi rhendzeleka ealitarini ya Xikwembu loko hi kombisa ripfumelo exitlhavelweni xa Yesu ni ku ‘pfumala nandzu emavokweni naswona hi basile embilwini,’ hi tirhela Yehovha hi mbilu hinkwayo.—Pisalema 24:4.

[Nhlamuselo ya le hansi]

[Xifaniso lexi nga eka tluka 23]

Alitari a yi fanekisela ku rhandza ka Yehovha, leyi eka yona a amukelaka xitlhavelo lexinene xo kutsula vanhu