Ku Tshama U Tshembekile Eka Yehovha

KU TSHEMBEKA, hambileswi ku kalaka namuntlha, i mfanelo leyi hlawulaka malandza ya Yehovha, Xikwembu xa ntiyiso. Munhu la tshembekaka u yima a tiyile emiringweni naswona a nga tsekatseki ku nga khathariseki leswaku ku hundza nkarhi wo tanihi kwihi. Anakanya hi Hosi Hezekiya lonene. Bibele yi ri: “Endzhaku ka yena a ku vanga na munhu la faneke na yena exikarhi ka tihosi hinkwato ta Yuda, hambi ku ri lava a va ri emahlweni ka yena.” I yini lexi endleke Hezekiya a hlawuleka? “U hambete a namarhela Yehovha,” hambileswi a hanya exikarhi ka vagandzeri va xikwembu xa mavunwa Moleke. Ina, Hezekiya “a nga hambukanga eku n’wi landzeleni [Yehovha], kambe u ye emahlweni a hlayisa swileriso swakwe.”—2 Tihosi 18:1-6.

Muapostola Pawulo i munhu un’wana loyi a tshameke a tshembekile eka Yehovha. Rhekhodo ya vutirheli bya yena leyi kumekaka eMatsalweni ya Vukreste ya Xigriki yi nyikela vumbhoni bya matimba bya ku tshembeka ka Pawulo eku tirheleni ka Xikwembu hi moya-xiviri hinkwawo. Loko vutomi bya yena bya laha misaveni byi ri kusuhi ni ku hela, Pawulo u swi kotile ku vula a ku: “Ndzi lwe nyimpi leyinene, ndzi tsutsume pfhumba ndzi kondza ndzi heta, ndzi hlayise ripfumelo.”—2 Timotiya 4:7.

Mawaku swikombiso leswinene swonghasi swa vutshembeki leswi hi nga na swona, Hezekiya na Pawulo! Onge hi nga tekelela ripfumelo ra vona hi ku tshama hi tshembekile eka Yehovha, Xikwembu xa hina Lexikulu.—Vaheveru 13:7.