I Mani La Nga Ta Herisa Madzolonga?

HI September 1999, Matsalana Jenerala wa Nhlangano wa Matiko, ku nga Kofi Annan u amukele vapfhumba eka nongonoko wa vu-54 wa lembe na lembe wa Nhlangano wa Mani na Mani. Hilaha swi vikiweke hakona eka The Toronto Star, u tlhontlhe varhangeri va misava, a ku: “Ku ni vanhu va ntsandza-vahlayi emisaveni hinkwayo lava nga laviki ku tweriwa vusiwana ntsena. Va lava mpfuno wa xiviri lowu nga ni xisekelo lexi tiyeke, leswaku va herisa maxangu lama vangiwaka hi madzolonga lama nga tshamelo-maxelo, ivi va pfuniwa leswaku va kota ku hanya vutomi lebyinene.”

Xana Nhlangano wa Matiko swin’we ni swirho swa wona swa matiko va nga nyikela “mpfuno wa xiviri lowu nga ni xisekelo lexi tiyeke” lowu lavekaka leswaku ku herisiwa madzolonga? Un’wana la tshahiweke eka xiviko xolexo xa Star, a ku ri Muungameri wa United States, ku nga Bill Clinton, u vule leswi: “Endzhaku ka ku halatiwa ka ngati ka lembe-xidzana leri, ha swi tiva leswaku swa olova ku vula leswaku ‘a swi nge he pfuki swi humelerile,’ kambe swa tika ku swi endla.” U engeterile: “Ku tshembisa swilo swo tala ngopfu ku nga ha va tihanyi leti fanaka ni ku honisa.”

Malembe lama tlulaka 2 500 lama hundzeke, muprofeta Yeremiya u vule leswi malunghana ni matshalatshala ya vanhu: “Oho Yehovha, ndzi swi tiva kahle leswaku ndlela ya munhu wa la misaveni a yi le ka yena. Munhu loyi a fambaka a nga ka a nga wu kongomisi nkondzo wa yena.” (Yeremiya 10:23) Kutani, hi wihi ntshembo lowu nga kona wo herisa madzolonga?

Loko hi hlaya Esaya 60:18, Xikwembu xi nyike xitiyisekiso lexi: “Madzolonga a ma nge he pfuki ma twiwile etikweni ra wena, ku phanga kumbe ku tshovelela emindzilakaneni ya wena.” Vuprofeta byolebyo byi hetiseke ro sungula loko Xikwembu xi tlherisela vanhu va xona lava a va ri evukhumbini etiko-xikaya ra vona. Nakambe byi ta hetiseka hi xitalo hi ndlela leyi hi nga ta yi tsakela. Yehovha Xikwembu a a nga “tshembis[i] swilo swo tala ngopfu.” Leswi a nga La Nge Henhla-henhla ni Muvumbi wa vanhu, hi yena la nga kotaka ku herisa “madzolonga lama nga tshamelo-maxelo.” Ehansi ka Mfumo wa Xikwembu, ku ta va ni ku rhula. Madzolonga ma ta va ma nga ha ri kona, ma heriseriwe makumu!—Daniyele 2:44.