Ha Yini U Fanele U Rivalela?

“VATIVI va sayense va simeke vulavisisi lebyi sunguleke ku kombisa leswaku ku rivalela ku nga pfuna munhu emintlhavekweni—swi nga ha n’wi pfuna ni hi tlhelo ra rihanyo,” ku vika The Toronto Star ya le Canada. Kambe, Profesa Carl Thoresen wa le Yunivhesiti ya Stanford le U.S.A., mulavisisi la nga mukongomisi wa Stanford Forgiveness Project, u vula leswaku “a va talanga vanhu lava twisisaka leswi ku rivalela swi vulaka swona ni ndlela leyi ku tirhaka ha yona.”

Ku rivalela hi mbilu hinkwayo i nchumu wa nkoka eka Vukreste. Xiviko xa The Toronto Star xi ku hlamusela tanihi “ku xiya leswaku u hoxeriwile, u tshika xikhomela hinkwaxo lexi vaka kona ivi eku heteleleni u khoma munhu la ku dyoheleke hi tintswalo ni hi rirhandzu.” Ku rivalela ku fanele ku hambanisiwa ni ku honisa, ku rivala, kumbe ku landzula nandzu; naswona a swi vuli ku tlhela u hlundzuka. Xiviko lexi xi vula leswaku xilotlelo xa ku rivalela ka xiviri i “ku tshika ku hlundzuka ni mintlhaveko leyi hoxeke.”

Valavisisi va vula leswaku ka ha fanele ku kambisisiwa swinene ndlela leyi munhu a pfunekaka ha yona hikwalaho ko rivalela. Hambiswiritano, va vulavula hi ndlela leyi munhu a pfunekaka ha yona emiehleketweni, ku katsa ni “ku hunguteka ka ntshikilelo ni gome.”

Xivangelo lexinene ngopfu xa ku va la rivalelaka xi hlamuseriwe eka Vaefesa 4:32, leyi nge: “Kombanani musa, mi tsetselelana swinene, mi rivalelana hi ku ntshunxeka tanihi leswi Xikwembu na xona xi mi rivaleleke hi ku ntshunxeka hi Kreste.” Malunghana ni ku rivalela, swin’we ni le timhakeni tin’wana, hi khutaziwa ku va vatekeleri va Xikwembu.—Vaefesa 5:1.

Ku ala ku rivalela van’wana loko ku ri ni xivangelo xo kombisa tintswalo swi nga byi khumba hi ndlela yo biha vuxaka bya hina ni Xikwembu. Yehovha u langutele leswaku hi rivalelana. Kutani hi nga khongela leswaku a ta hi rivalela.—Matewu 6:14; Marka 11:25; 1 Yohane 4:11.