Mintirho Leyinene Yi Dzunisa Xikwembu

LAVA va rhandzaka Xikwembu va lwela ku kombisa ku vonakala ka moya loku humaka eRitweni ra xona, ku nga Bibele. Loko va endla tano, va landzela xileriso xa Yesu lexi nge: “Ku voninga ka n’wina a ku vonakale emahlweni ka vanhu, leswaku va ta vona mintirho ya n’wina leyinene kutani va vangamisa Tata wa n’wina la nge matilweni.” (Matewu 5:16) Leswi vuriwaka kun’we ni ku tikhoma lokunene swi dzunisa Xikwembu.

Timbhoni ta Yehovha ti lava ku tsakisa Xikwembu hi ku endla leswi pfumelelanaka ni Bibele ni ku lwela ku pfuna van’wana hi tlhelo ra moya. Sweswo ti swi endla ni le matikweni lawa ntirho wa tona wa le rivaleni wu nga si tsarisiwaka ximfumo. Entsindza wa le ka rin’wana ra matiko lawa, Timbhoni a ti khoma mintsombano ya lembe ni lembe laha a ku va ni vanhu lava sukelaka eka 6 000 ku ya eka 9 000. Leswaku va khoma minhlangano yo tano, a va hirha tiholo ta mintlango. Hilaha ti endleke hakona malembe lama hundzeke, loko ntsombano wa tona wa 1999 wu nga si sungula, madzana ya Timbhoni ma tirhe hi matimba ma basisa miako yoleyo ma tlhela ma veka swipikara ni magidi ya switulu.

Vanhu va swi xiyile swilo leswi hinkwaswo. Vatirhi lava lawulaka muako lowu va yi xiyile mintirho leyi. Va tlhele va swi xiya leswaku, hambileswi a ku ri ni vanhu va 15 666, swilo hinkwaswo swi fambe kahle naswona Timbhoni a ti hleleke ngopfu. Vatirhi va kwalaho va tlhele va tsakisiwa hi leswi ti basiseke ku sala ku lo paa, endzhaku ka ntsombano.

Valawuri va kombise ku tlangela hi ku nyika Timbhoni lunghelo ro va to sungula enxaxamelweni wa lava nga ta hirha muako lowu haxawa. Kambe valawuri a va endlanga sweswo ntsena. Hi July 15, 1999, va nyike vamakwerhu lava nga eka komiti ya ntsombano sagwadi ro tlangela. Marito lawa a ma kovotliwe eka rona a ma ku, “vandlha ra Timbhoni ta Yehovha”—ku nga nchumu lowu a wu nga languteriwanga etikweni leri ntirho wa tona wo dyondzisa hi Bibele wu yirisiweke.

Emisaveni hinkwayo hi 2000/2001, ku languteriwe leswaku vanhu va timiliyoni va va kona eka madzana ya Mintsombano ya Muganga ya Timbhoni ta Yehovha ya “Vaendli Va Rito Ra Xikwembu.” Loko wo va kona, u nga tivonela hi wexe ndlela leyi vanhu lava va endlaka leswi vuriwaka eBibeleni va yi endlaka ha yona mintirho leyinene leyi dzunisaka Xikwembu.