Rirhandzu Ra Vukreste—A Hi Ra Nomu Ntsena

LOKO ndzilo wu hise yindlu ya ndyangu wa ka Bartholomew le Trinidad, va lo ponisa vutomi bya vona ntsena. Xaka ra vona leri tshamaka ekusuhi na vona ri va tekile ri ya tshama na vona, kambe a swi helelanga kwalaho.

Olive Bartholomew i Mbhoni ya Yehovha, naswona swirho swa vandlha leri a nga eka rona—swin’we ni leswi nga etindhawini ta le kusuhi—swi sungule ku endla minyikelo ya ku pfuxa yindlu ya yena ni ndyangu wakwe. Ku simekiwe komiti leyi nga ta langutela ku aka koloko, kutani ku sunguriwa ku aka. Timbhoni ta kwalomu ka 20, swin’we ni vaakelani van’wana, a va ri kona. Ni vantshwa a va ri kona, kasi van’wana a va tele ku ta va nyika swo miyeta nyoka.

Olive u te: “Ndyangu wa mina wu hlamarile,” hilaha swi vikiweke hakona eka Sunday Guardian ya le Trinidad. “Vona a hi Timbhoni, naswona nuna wa mina wa ha hlamarisiwe hi leswi a swi vonaka.”

Loko a katsakanya matshalatshala lawa, mukongomisi wa tsima ro aka u kandziyise leswaku mintirho yo tano i swikombiso swa xiviri swa Vukreste bya ntiyiso. U te: “A ho famba hi yindlu ni yindlu hi vulavula hi rirhandzu ntsena. Hi ringeta ku endla leswi hi swi chumayelaka.”—Yohane 13:34, 35.

[Xifaniso lexi nga eka tluka 32]

Olive Bartholomew ni nuna wa yena