Vuxongi Bya Mbilu Byi Ni Nkoka Lowu Nga Heriki

MUKRESTE LA DYUHALEKE, LA TSHEMBEKAKA U TE: “JAHA RI TEKA VUXONGI BYI FANA NI VUNENE.”

Ina, i khale vanhu va rhangisa swinene vuxongi bya le handle, leswi hakanyingi swi endleke leswaku va honisa vuxongi bya le ndzeni. Hambiswiritano, Mutumbuluxi wa hina u languta leswi hi nga swona endzeni, ku nga khathariseki leswaku xivumbeko xa hina xa le handle xi njhani. Hi ndlela leyi u hi vekela xikombiso lexinene ngopfu xa ku languta swilo hi ndlela leyi kombisaka ku wupfa. Bibele yi vula leswaku Xikwembu xi te: “Xikwembu a xi voni hi ndlela leyi munhu a vonaka ha yona, hikuva munhu u vona ntsena leswi vonakaka ematihlweni; kambe loko ku ri Yehovha, u vona leswi mbilu yi nga swona.”—1 Samuwele 16:7.

Xikwembu i Xihlovo xa ku saseka ka xiviri ka vanhu, naswona Rito ra xona ri paluxa leswaku loko ku kambisisiwa leswi munhu hakunene a nga xiswona, lexi nga xa nkoka swinene i timfanelo ta moya. Bibele yi ri: “Vuxongi byi nga ha va vunwa, ku saseka ku nga ha va vuhava; kambe wansati la chavaka Yehovha hi yena loyi a tikumelaka ku dzunisiwa.” (Swivuriso 31:30) Hakunene, kuwa ro tshwuka ri ni xivungu endzeni. (Estere 1:10-12; Swivuriso 11:22) Hambileswi ku saseka ka miri ku nga ha helaka hi ku famba ka nkarhi, ku saseka ka le ndzeni—timfanelo ta mbilu—ku nga kula ku tlhela ku tshama nkarhi wo leha.

Hikwalaho, i vutlhari ku hlakulela timfanelo to tanihi rirhandzu, ntsako, ku rhula, ku va ni mbilu yo leha, musa, vunene, ripfumelo, ku olova ni ku tikhoma! (Vagalatiya 5:22, 23) Xisweswo hi nga swi kota ku va ni vuxongi bya le ndzeni, lebyi ku nga byona byi nga ni nkoka lowu nga heriki.—1 Petro 3:3, 4.