Ku Lwa Ni Vusweti Xana I Ku Tlanga Hi Nkarhi?

VAPFHUMBA lava endzelaka Nhlangano wa Matiko eDorobeni ra le New York va valanga Yindlu ya Ikhonomi ni ya Huvo ya Tiko, eka silingi leyi nga ehenhla ka xiteji ku vonaka tiphayiphi ta gezi ni ta mati. Munhu loyi a va valangisaka wa hlamusela: “Silingi leyi ‘nga si helaka’ yi tekiwa tanihi xikombiso xa leswaku ntirho wa Nhlangano wa Matiko lowu katsaka ikhonomi ni wa tiko a wu nge pfuki wu herile; ku ta tshama ku ri ni swo tala leswi fanelaka ku endliwa leswaku ku antswisiwa xiyimo lexi vanhu va misava va hanyaka ehansi ka xona.”

Hambileswi Huvo leyi yi tinyiketeleke ku antswisa ndlela leyi vanhu hinkwavo va hanyaka ha yona, ntirho wu vonaka wa ha lo vuya. Lexi tsakisaka hi lembe-xidzana ro sungula C.E., hi nkarhi wa vutirheli bya Yesu Kreste emisaveni, u te: “Moya wa Yehovha wu le ka mina hikuva u ndzi tote leswaku ndzi vula mahungu lamanene eka swisiwana.” (Luka 4:18) Xana hi wahi “mahungu lamanene” lama a ma twariseke? A ku ri rungula leri vulavulaka hi Mfumo wa leswaku Yehovha Xikwembu, loyi a veke “khokholo ra swisiwana emaxangwini,” wu ta simekiwa hi Yesu Kreste tanihi Hosi. Xana Mfumo wolowo wu ta endla yini? Esaya u profetile: “Kunene Yehovha wa mavuthu u ta endlela vanhu hinkwavo . . . nkhuvo wa swakudya swo nona, nkhuvo wa vhinyo leyi kumekaka eswiseseni, wa swakudya swo nona leswi nga ni mongo, wa vhinyo leyi kumekaka eswiseseni, leyi hlutiweke. Entiyisweni u ta mita rifu hi masiku, kunene Yehovha, Hosi leyi Lawulaka yi ta sula mihloti eswikandzeni hinkwaswo.”—Esaya 25:4-6, 8.

Xana u nga lava ku tiva swo tala malunghana ni ndlela leyi Mfumo wa Xikwembu wu nga ta “antswisa ndlela leyi vanhu hinkwavo va hanyaka ha yona,” lerova vanhu va nga ha pfumali nchumu? Languta laha ehansi u ta vona ndlela leyi u nga n’wi kumaka ha yona loyi a fanelekaka leswaku a ta ku endzela leswaku a ku komba swo tala malunghana ni leswi Bibele yi swi vulaka etimhakeni leti.