Swilo Leswi Hlaselaka Mirhi

EMINKARHINI ya vanhu lava Bibele yi vulavulaka ha vona, loko u ri na mirhi a wu ri na swilo swa nkoka. Hi xikombiso, loko Abrahama a xave ndhawu ya xilahlo leyi a a ta lahla Sara nkatakwe la rhandzekaka eka yona, ku endliwe ntwanano wa leswaku loko a xava ndhawu leyi a nyikiwa ni mirhi ya kona.—Genesa 23:15-18.

Ni namuntlha mirhi yi tekiwa yi ri ya nkoka swinene, naswona vanhu vo tala ematikweni hinkwawo va lwela leswaku ku hlayisiwa swihlahla. Buku leyi nge State of the World 1998 yi ri: “Hambileswi vanhu vo tala va le matikweni ya le n’walungwini va vilelaka hi vuhlayiseki bya swihlahla swa le nhoveni, swi nga endleka va nga swi xiyi leswaku swihlahla leswi nga emitini ya vona hi swona leswi hlaseriwaka ngopfu.” I yini lexi xungetaka vuhlayiseki bya swihlahla ematikweni wolawo ya le n’walungwini, ku nga Yuropa na Amerika N’walungu? Vanhu vo tala va vula leswaku i ku tsemeleriwa ka swihlahla, kambe ku ni swilo swin’wana leswi tumbeleke, leswi herisaka swihlahla hakatsongo-tsongo. I yini swilo swa kona? I ku thyakisiwa ka moya ni mpfula ya asidi. Swilo leswi swi nga tsanisa mirhi hakatsongo, swi endla leswaku yi hlaseriwa hi ku olova hi switsotswana ni mavabyi.

Hi makume ya malembe, vahlayisi va mbango ni vanhu van’wana lava karhatekaka va be hungwe ra ku hlayisa fambiselo ra ekholoji ya misava. Hi va-1980, endzhaku ka loko vativi va sayense va le Jarimani va endle nkambisiso wa vuyelo bya ku thyakisiwa ka moya ni mpfula ya asidi leyi nelaka mbangu, va gimete hi ku: ‘Loko ku nga endliwi nchumu hi swona, kwalomu ka lembe ra 2000, vanhu va to sala va swi hlambanyisa hi ku swi vona eswifanisweni swa khale ni le ka tifilimi.’ Nkateko wa kona, swihlahla swi ni matimba yo tipfuxeta lerova swi kote ku hanya ku tlula ndlela leyi a ku vhumbhiwe yona.

Kambe eku heteleleni i Xikwembu lexi nga ta hlayisa fambiselo ra hina ra ekholoji hi ku helela. “U cheleta tintshava a ri emakamareni yakwe ya le henhla,” naswona “u endla leswaku byanyi bya rihlaza byi hlukela swiharhi, ni ximila lexi nga ta tirhisiwa hi vanhu.” Naswona u tshembise leswaku u ta “lovisa lava onhaka misava.” (Pisalema 104:13, 14; Nhlavutelo 11:18) Swi ta tsakisa swonghasi loko vaaki va misava va ta kota ku hanya hi masiku emisaveni leyi nga riki na nthyakiso!—Pisalema 37:9-11.