“Ndzi Ta Ku Vona eMfun’weni Wa Xikwembu”

“Nakulorhi La Rhandzekaka! Rupert, namuntlha ndzi gweveriwe rifu. U nga ndzi rileli. Ndza ku rungula kun’we ni hinkwavo ekaya. Ndzi ta ku vona eMfun’weni wa Xikwembu.”

HI JUNE 8, 1942, Franc Drozg u tsale marito wolawo emahlweninyana ka ku baleseriwa ka yena hi masocha ya Manazi. Xana a a dlawela yini?

Hi ku ya hi rungula leri kumekaka eMuziyamu wa Ntshunxeko wa Tiko wa le dorobeni ra Maribor, le Slovenia, mufuri loyi wa tinsimbi wa malembe ya 38 u ale ku joyina vuthu ra Wehrmannschaft, ku nga ntlawa wa masocha lama pfunetaka le tikweni ra Slovenia leri a ri tekiwe hi Majarimani. A a ri Bibelforscher kumbe Xichudeni xa Bibele, hilaha Timbhoni ta Yehovha a ti tiviwa hakona endhawini yoleyo. Hi ku ya hi Esaya 2:4, a a nga ta swi kota ku seketela nyimpi ya Manazi, xisweswo a kombisa leswaku u le hansi ka Mfumo wa Xikwembu.—Matewu 6:33.

Le mutini wa ka vona wa Ptuj, Franc a a tiviwa a ri muhuweleri la hisekaka wa mahungu lamanene ya Mfumo wa Xikwembu. (Matewu 24:14) Hambileswi a langutaneke ni swiphiqo swo tala, u phikelerile a chumayela mahungu lamanene ku fikela loko a khomiwa hi May 1942.

Timbhoni ta Yehovha to tala ta le Slovenia ti cinisiwe gija hi Manazi. Franc u ve un’wana wa lavo sungula ku dlawela vupfumeri byakwe. Ku fana ni Vakreste va lembe-xidzana ro sungula, u tiyisiwe hi marito lama nge: “Hi fanele ku nghena emfun’weni wa Xikwembu hi mahlomulo yo tala.” (Mintirho 14:22) Ntshembo lowu a a ri na wona hi hulumendhe yoleyo ya le tilweni wu kombisiwe hi marito yakwe yo hetelela lama nge, “Ndzi ta ku vona eMfun’weni wa Xikwembu.”

[Mimfungho ya Vini va Swifaniso eka tluka 32]

Franc Drozg: Photo Archive-Museum of National Liberation Maribor, Slovenia; letter: Original kept in Museum of National Liberation Maribor, Slovenia