“Hi Ku Vonakala Loku Humaka Eka Wena Hi Nga Vona Ku Vonakala”
HAKANYINGI ku vonakala a hi khathali ha kona, ku fikela loko gezi ri timeka kutani muganga wa ka hina hinkwawo wu sala wu phutseriwe hi munyama. Lexi tsakisaka, “gezi” ra hina ra le tilweni—ku nga dyambu—ri tshembeka hi ku helela. Naswona hikwalaho ka ku vonakala loku humesiwaka hi dyambu, hi kota ku vona, ku dya, ku hefemula ni ku hanya.
Tanihi leswi ku vonakala ku nga ka nkoka evuton’wini, a swi fanelanga swi hi hlamarisa leswi buku ya Genesa yi vulaka leswaku ku vonakala ku ve kona hi siku ro sungula ra ku tumbuluxiwa ka swilo. “Xikwembu xi ku: ‘Ku vonakala a ku ve kona.’ Hiloko ku vonakala ku va kona.” (Genesa 1:3) Vanhu lava nga ni xichavo vo kota Hosi Davhida a va teka Yehovha a ri yena xihlovo xa vutomi na ku vonakala. Davhida u tsale a ku: “Hi wena u nga ni xihlovo xa vutomi; hi ku vonakala loku humaka eka wena hi nga vona ku vonakala.”—Pisalema 36:9.
Marito ya Davhida ma tirha hi ndlela leyi kongomeke ni yo fanekisela. Encyclopædia Britannica yi ri: “Entiyisweni ku vonakala hi kona ku endlaka leswaku hi kota ku vona.” Yi ya emahlweni yi ku: “Byongo bya munhu byi kuma rungula ro tala hi ku pfuniwa hi mahlo ku tlula switwi leswin’wana.” Tanihi leswi swo tala swa leswi hi swi dyondzaka swi titshegaka hi nyiko leyi ya ku vona—leyi lavaka ku vonakala leswaku yi tirha kahle—eMatsalweni ku vonakala ku tirhisiwa ni hi ndlela yo fanekisela.
Hikwalaho, Yesu u byele vadyondzisiwa vakwe a ku: “Hi mina ku vonakala ka misava. Loyi a ndzi landzelaka a nge pfuki a fambe emunyameni, kambe u ta kuma ku vonakala ka vutomi.” (Yohane 8:12) Ku vonakala ko fanekisela loku Yesu a vulavuleke ha kona a ku ri rungula ra ntiyiso leri a ri chumayeleke, leri a ri kota ku voningela mianakanyo ni timbilu ta vayingiseri vakwe. Endzhaku ko heta malembe va ri emunyameni wa moya, vadyondzisiwa va Yesu va hetelele va kote ku twisisa xikongomelo xa Xikwembu hi vanhu kun’we ni ntshembo wa Mfumo. Koloko a ku ri “ku vonakala ka vutomi” hakunene, tanihi leswi ku tiva mhaka yoleyo a swi yisa evuton’wini lebyi nga heriki. Loko a ri karhi a khongela Tata wakwe wa le tilweni, Yesu u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Hi nga tshuki hi honisa ku vonakala loku ka moya!