Mintirho Leyinene Yi Dzunisa Xikwembu

VAKRESTE va ntiyiso va dzunisa Xikwembu hi mahanyelo ni mintirho leyinene. (1 Petro 2:12) Xikombiso xa sweswo i mhaka leyi humeleleke eItaliya eka malembenyana lama hundzeke.

Hi September 1997, ku ve ni ku ninginika lokukulu ka misava etindhawini to hambana-hambana le Marche ni le Umbria, laha ku onhakeke makaya ya kwalomu ka 90 000. Mintlawa ya Timbhoni ta Yehovha yi hatle yi ya phalala vapfumeri-kulobye ni van’wana. Ku tisiwe tikharavhani, minkumba, switofu, tijanareta ni swilo swin’wana leswi a swi laveka. Ntirho wo tano wo phalala wu lemukiwe ni hi van’wana.

Phepha-hungu leri nge Il Centro ri te: “Vanhu vo sungula ku fika ni swilo swo phalala ha swona laha ku tsekatseka ka misava ku onheke kona i Timbhoni ta Yehovha ta le Roseto [exifundzheni xa Teramo] . . . Vanhu lava nga ni ripfumelo eka Yehovha va hlangana nkarhi na nkarhi, va tirha ntirho lowu vonakaka, va pfuna lava xanisekaka, va nga lavi ku tiva leswaku i swirho swa vukhongeri byihi.”

Meyara wa Nocera Umbra, ku nga rin’wana ra madoroba lama hlaseriweke ngopfu, u tsalele Timbhoni a ku: “Ndza mi nkhensa swinene hi ndlela leyi mi va pfuneke ha yona vanhu va le Nocera. Ndza tiyiseka leswaku ni vaaki hinkwavo va doroba leri va titwisa sweswo.” Tlhandla-kambirhi, Ndzawulo ya Timhaka ta Xikaya yi nyike Congregazione Cristiana dei Testimoni di Geova (Vandlha ra Vukreste ra Timbhoni ta Yehovha) xitifiketi xa ku nkhensa ni mendlele “leyi nga vumbhoni bya ntirho lowu endliweke malunghana ni mhangu leyi humeleleke eUmbria ni le Marche.”

Hi October 2000, ku ve ni ndhambi leyi onheke swinene le Piedmont, en’walungwini wa Italiya. Nakambe Timbhoni ti hatle ti teka goza ti ya phalala. Mintirho yo tano leyinene na yona yi lemukiwile. Xifundzha xa Piedmont xi va nyike ribye ra xitsundzuxo hikwalaho ka “ntirho wa nkoka wa ku phalala vaaki va le Piedmont lava hlaseriweke hi ndhambi.”

Yesu Kreste u lerise vadyondzisiwa vakwe a ku: “Ku voninga ka n’wina a ku vonakale emahlweni ka vanhu, leswaku va ta vona mintirho ya n’wina leyinene kutani va vangamisa Tata wa n’wina la nge matilweni.” (Matewu 5:16) Hi ku endla “mintirho leyinene” leyi pfunaka vaakelani va tona hi tlhelo ra moya ni hi tindlela tin’wana, Timbhoni ta Yehovha ti dzunisa Xikwembu hi ntsako, ku nga ri ku tidzunisa.