‘Rirhandzu Ra Hina Ri Kurile’

HI RAVUNTLHANU, March 31, 2000, Ntshava ya Usu le Hokkaido, eJapani yi bulukile endzhaku ko heta malembe ya 23 ya ha verhamile. Vaaki va kwalaho lava hlayiwaka hi magidi va boheke ku baleka exivandleni xexo xa khombo. Vo tala va lahlekeriwe hi makaya ni mintirho, kambe nkateko wa kona, a nga kona loyi a lahlekeriweke hi vutomi byakwe. Exikarhi ka vanhu lava bohekeke ku baleka a ku ri ni Timbhoni ta Yehovha ta 46, kambe a ti lahliwanga.

Hi siku leri ntshava yi bulukeke ha rona, mulanguteri la nga Mukreste loyi a fambaka a endzela mavandlha ya kwalaho u pfunetile eku sunguleni ka ku endla malunghiselelo ya ntirho wo phalala. Hi ku hatlisa, swilo swo phalala hi swona swi fikile swi huma emavandlheni ya le kusuhi ni ndhawu yoleyo. Hi xihatla ku vumbiwe komiti ya mphalalo leyi a yi languteriwa hi rhavi ra le Japani, naswona minyikelo yo tala leyi humaka eka Timbhoni ta Yehovha etikweni hinkwaro ra Japani yi hlanganisiwile leswaku yi pfuna eka mphalalo. Leswaku ku khathaleriwa vumoya bya vamakwerhu, vachumayeri va nkarhi hinkwawo lava nga Timbhoni ta Yehovha va rhumeriwe emavandlheni lama khumbekeke swinene, naswona mulanguteri la famba-fambaka u endzele ndhawu yoleyo hi ku phindha-phindha leswaku a chavelela vamakwerhu ni ku va aka emoyeni.

Timbhoni leti tshamaka endhawini leyi khumbekeke ti hambete ti va ni minhlangano ya tona ya Vukreste enkarhini wolowo wo tika, ti tirhisa makaya lama nga etindhawini leti hlayisekeke. Loko ku humesiwa xileriso xa ku tlhelela endhawini leyi Holo ya Mfumo a yi ri eka yona, vamakwerhu va fike va kuma muako lowu voyameke, lowu pandzekeke wu tlhela wu onhaka. Ekusuhi ni Holo ya Mfumo, ntshava a ya ha tuvika musi wa ntima dzwii! Timbhoni ti tivutisile, ‘Xana i swinene leswaku hi hambeta hi khomela minhlangano ya hina endhawini leyi? Xana Holo ya Mfumo yi fanele yi pfuxiwa ke?’

Ku endliwe xiboho xa ku aka Holo ya Mfumo leyintshwa endhawini ya le kusuhi leyi hlayisekeke. Komiti yo Aka ya Xifundzha na yona yi pfunetile. Mali leyi nyikeriweke hi Timbhoni ta le tikweni hinkwaro yi tirhiseriwe ku aka holo ya kona. Ndhawu yi hatle yi kumeka, naswona vapfuneti lava hlayiwaka hi madzana va endle leswaku Holo ya Mfumo leyintshwa yi hetiwa hi nkarhi wo koma swinene. Hi Sonto, July 23, 2000, ku ve ni vanhu va 75 enhlanganweni wo sungula lowu khomeriweke eHolweni ya Mfumo leyi a ya ha ku akiwa. Vo tala lava a va ri kona a va khavaxela mihloti ya ntsako. Loko Holo ya Mfumo yi nyiketeriwa hi lembe rero hi n’hweti ya October, un’wana wa vakulu va vandlha ra kwalaho u te: “Ku buluka ka ntshava ku hi cinise rhuvurhuvu. Kambe muako lowu wu tsuvule mabibi ya mbilu wu hi nyika ntsako. Rirhandzu ra hina eka Yehovha ni le ka vamakwerhu lava rhandzekaka va Vakreste ri kurile!”

[Laha Xifaniso Xi Humaka Kona eka tluka 19]

Eruption of Mount Usu: AP Photo/Koji Sasahara