“U Tiyisile, Vutomi Bya Tsakisa!”

XANA wa swi tsakela ku tiva xikongomelo xa vutomi? Magdalena wa malembe ya 18 hi vukhale, loyi a nga Mbhoni ya Yehovha loyi a tshamaka eSzczecin, le Poland, u pfune Katarzyna loyi a nghena na yena etlilasini exikolweni xa le henhla ku xi tiva xikongomelo lexi. Katarzyna a nga pfumeli leswaku Xikwembu xi kona, kambe loko Magdalena a vulavula na yena hi Bibele, u kombise ku tsakela ka xiviri.

Hambileswi Katarzyna a ri tsakeleke rungula ro huma eBibeleni leri Magdalena a n’wi byeleke rona, a nga ri amukelanga. Loko a ri karhi a vulavula na Magdalena malunghana ni vanghana va xiviri, Katarzyna u vule leswi: “U ni Bibele; u tiva misinya ya milawu leyi u faneleke u yi landzela ni laha u nga kumaka vanghana. Kambe, xana ku vuriwa yini hi lava sweswi va nga yi amukeleki misinya yoleyo ya milawu?”

Ku ve ni ku cinca lokukulu loko Katarzyna a ya eLondon, le Nghilandhi. Loko a ri kwale u endzele rhavi ra Timbhoni ta Yehovha naswona u khumbiwe hi musa lowu va n’wi kombeke wona. Swilo swo fana ni ku n’wi pfulela rivanti ni ku kombisa ku tsakela ka xiviri eka leswi a a swi vula, swi n’wi tsakisile.

Loko ku sungula lembe lerintshwa ra xikolo hi September 2001, Katarzyna u endle xiboho xo amukela dyondzo ya Bibele ya nkarhi ni nkarhi. U ya a yi xixima swinene misinya ya milawu ya Bibele naswona wa yi tirhisa siku na siku. Sweswinyana, u phofule swa le mbilwini eka Magdalena a ku: “Ndzi twa onge ndzi sungula vutomi lebyintshwa.” U tlhele a rhumela ni rungula ro koma hi selfoni a ku: “Ndza yi tlangela swinene dyondzo ya hina ya namuntlha! U tiyisile, vutomi bya tsakisa! Swa tsakisa ku tiva leswaku i mani loyi hi faneleke hi n’wi nkhensa hikwalaho ka sweswo.”