Timbhoni Ta Yehovha Leti Dlayiweke Ta Tsundzukiwa

HI March 7, 2002, ku pfuriwe beji ya xitsundzuxo edorobeni ra Körmend le vupela-dyambu bya Hungary. A yi tsundzuxa hi ta rifu ra Timbhoni ta Yehovha tinharhu leti dlayiweke hi Manazi hi 1945.

Beji leyi yi beleriwe ekhumbini ra yindlu-nkulu ya namuntlha ya ndzawulo yo tima ndzilo ePatwini ra Hunyadi, laha ti dlayeriweke kona ti ri karhi ti voniwa hi mani na mani. Beji leyi yi nyiketeriwe leswaku yi va xitsundzuxo xa ‘Vakreste lava va nga dlayiwa hileswi va aleke ku nghenela vusocha hikwalaho ka ripfalo ra vona ra vukhongeri, hi March 1945. Antal Hőnisch (1911-1945), Bertalan Szabó (1921-1945) na János Zsondor (1923-1945), 2002, Timbhoni ta Yehovha.’

Ku dlayiwa loku ku humelele loko ka ha sele tin’hweti timbirhi leswaku ku hela Nyimpi ya Vumbirhi ya Misava. Ha yini Vakreste lava va dlayiwile? Phepha-hungu ra le Hungary leri vitaniwaka Vas Népe ra hlamusela: “Endzhaku ka loko Hittler a sungule ku fuma eJarimani, a a nga tiyimiselanga ku xanisa Vayuda ntsena kambe u tlhele a xanisa na Timbhoni ta Yehovha, a ti yisa ekampeni ya nxaniso ni ku tidlaya loko ti nga pfumeli ku landzula ripfumelo ra tona. . . . Hi March 1945, ku humelele khombo lerikulu exiphen’wini xa le vupela-dyambu bya Hungary. . . . Khombo rin’wana ra kona a ku ri ku hlongoriwa ni ku dlayiwa ka Timbhoni ta Yehovha.”

Nongonoko wa ku pfuriwa ka beji leyi a wu avanyisiwe hi swiyenge swimbirhi. Xo sungula xi endleriwe endlwini ya mintlangu ya le Batthyány Castle, laha swivulavuri swa kona a ku ri Profesa Szabolcs Szita, murhangeri wa Holocaust Documentation Center eBudapest; László Donáth xirho xa Komiti ya Palamendhe ya Timfanelo ta Vanhu ni Timhaka ta Vukhongeri; na Kálmán Komjáthy mbhoni leyi ku voneke hi mahlo ku dlayeteriwa ka vanhu loyi sweswi a nga n’wamatimu wa le dorobeni rero. Vanhu vo tlula 500 lava a va ri kona va tlhele va ya eka xiyenge xa vumbirhi—xa ku pfuriwa ka beji yoleyo hi Meyara József Honfi wa le Körmend.

Eka papila ra yena ro lela, Ján Žondor (János Zsondor) u khutaze vamakwavo va yena va Vakreste leswaku va nga vi ni gome. U tsarile: “Ndza ha ma tsundzuka marito ya Yohane lama nga eka Nhlavutelo 2:10: ‘Tikombiseni mi tshembekile ku ya fikela eku feni.’ . . . Byelani vamakwerhu leswaku va nga rili hikuva ndzi fela ntiyiso a ndzi fi ku fana ni mudyohi.”

[Xifaniso lexi nga eka tluka 32]

Bertalan Szabó

[Xifaniso lexi nga eka tluka 32]

Antal Hőnisch

[Xifaniso lexi nga eka tluka 32]

Ján Žondor