Vugandzeri Bya Ntiyiso Byi Endla Leswaku Ndyangu Wu Va Ni Vun’we

MARIA a a ri ni malembe ya 13 hi vukhale loko yena ni ndzisana yakwe Lucy va twa hi ta Yehovha eka xaka ra vona. Xaka leri ri tlhele ri va hlamusela hi ntshembo wa Paradeyisi ya laha misaveni. Hi ku tsaka, va fambe na rona eHolweni ya Mfumo ya Timbhoni ta Yehovha. Maria u tsakisiwe hi ndzayo leyi twisisekaka leyi yi nyikeriweke kwalaho. Hakunene a yi hambanile swinene ni ya le kerekeni, laha nchumu lowu a wu endliwa swinene a ku ri ku yimbelela! Ku nga ri khale vana lava va sungule ku dyondza Bibele ni Mbhoni yin’wana ya Yehovha.

Buti wa vona, Hugo a a rhandza filosofi ni dyondzo ya hundzuluko. A a vula leswaku a nga pfumeli eka Xikwembu. Kambe loko a ri entirhweni wa vusocha, u hlaye buku leyi nge Life—How Did It Get Here? By Evolution or by Creation? a U kume tinhlamulo ta swivutiso leswi a ku ri hava vukhongeri lebyi nga swi hlamulaka. Loko a heta ntirho wa yena wa vusocha, u sungule ku tiyisa ripfumelo ra yena leri a ha ku va na rona eka Xikwembu hi ku dyondza Bibele ni ku ya eminhlanganweni swin’we ni tindzisana takwe. Maria na Lucy va khuvuriwe hi 1992, endzhaku ka malembe mambirhi va twe ntiyiso ro sungula, naswona buti wa vona u khuvuriwe endzhaku ka malembe mambirhi.

Hi nkarhi wolowo, vatswari va vona lava a va ri Makhatoliki, a a va nga wu tsakeli ntiyiso. A va teka Timbhoni ta Yehovha ti ri leti siringaka, hambileswi a va xixima mahanyelo lamanene ni maambalelo ya vantshwa lava nga Timbhoni lava a va rhambiwa hi vana va vona ekaya. Nakambe, hi nkarhi wo dya, loko vana lava va vulavula hi leswi va swi dyondzeke eminhlanganweni, vatswari va vona va ye va tsakela ku tiva leswi engetelekeke.

Hambiswiritano, vatswari havambirhi a va rhandza vuloyi. Tata wa vona a a ri xindzendzele lexi baka mana wa vona. Ndyangu lowu a wu ri kusuhi ni ku hahluka. Hiloko tata wa vona a heta mavhiki mambirhi a ri ekhotsweni hikwalaho ka swilo leswi a swi endleke loko a dakwile. Loko a ri ekhotsweni, u sungule ku hlaya Bibele. Loko a ri karhi a hlaya u xiye marito ya Yesu malunghana ni xikombiso xa masiku ya makumu. Leswi a a va lava ku tiva nhlamuselo ya kona, tatana na manana va ye eHolweni ya Mfumo naswona va pfumele ku va ni dyondzo ya le kaya ya Bibele. Loko se va dyondze ntiyiso, va cukumete tibuku ta vona hinkwato ta vuloyi hiloko va va va ntshunxekile eku hlaseriweni hi madimona hikwalaho ko vitana vito ra Yehovha. Va sungule ku hundzula vumunhu bya vona hi ndlela leyi xiyekaka.

Xana wa anakanya ndlela leyi Maria na Lucy a va tsake ha yona loko va vona vatswari va vona va khuvuriwa hi Hugo eka ntsombano wun’wana wa muganga le Bolivia hi 1999? Se ku hundze malembe ya kaye Maria na Lucy va twe hi ta Yehovha ni hi switshembiso swakwe. Vona na Hugo va le ntirhweni wa nkarhi hinkwawo sweswi. Mawaku ntsako lowu va nga na wona hikwalaho ka leswi vugandzeri bya ntiyiso byi endleke leswaku ndyangu wa ka vona wu va ni vun’we!

[Nhlamuselo ya le hansi]