Mpfuno Wa Xiviri Eka Swisiwana

LOKO Yesu Kreste, la nga N’wana wa Xikwembu, a ha ri emisaveni, u kombise nkhathalelo wa xiviri hi ku pfuna swisiwana. Loko mbhoni yin’wana leyi tivoneleke hi ya yona yi vulavula hi vutirheli bya Yesu, yi te: “Lava feke mahlo va vona, ni lava khutaka va famba, va nhlokonho va basisiwa naswona lava feke tindleve va twa, ni lava feke va pfuxiwa, ni swisiwana swi byeriwa mahungu lamanene.” (Matewu 11:5) Hikokwalaho, ku vuriwa yini hi vanhu va timiliyoni lava nga swisiwana namuntlha? Xana ma kona mahungu lamanene lawa va nga byeriwaka wona? Ina, ku ni rungula leri nyikaka ntshembo!

Hambileswi swisiwana hakanyingi swi nga tekeriwiki enhlokweni ni ku tlhela swi rivariwa hi vanhu hi ku angarhela, Rito ra Xikwembu, ku nga Bibele ra tshembisa ri ku: “Xisiwana a xi nge rivariwi nkarhi hinkwawo, hambi ku ri ntshembo wa lavo rhula a wu nge heli.” (Pisalema 9:18) Marito lawa lama chavelelaka ma ta hetiseka loko Mfumo wa Xikwembu, lowu nga hulumendhe ya xiviri ya le tilweni, wu siva mimfumo hinkwayo ya vanhu. (Daniyele 2:44) Leswi a nga ta va a ri Hosi ya hulumendhe yoleyo ya le tilweni, Yesu ‘u ta va ni nsovo eka loyi a pfumalaka ni loyi a nga xisiwana, u ta ponisa moya-xiviri wa swisiwana. U ta kutsula moya-xiviri wa vona eku tshikileriweni ni le madzolongeni, ni ngati ya vona yi ta va ya risima ematihlweni ya yena.’—Pisalema 72:13, 14.

Xana swiyimo swi ta va swi ri njhani loko Kreste a fuma misava? Lava hanyaka ehansi ka mfumo wa Kreste emisaveni va ta tsakela mihandzu ya ntirho wa vona. Eka Mikiya 4:3, 4, Bibele yi ri: “Entiyisweni va ta tshama, un’wana ni un’wana ehansi ka murhi wakwe wa vhinya ni le hansi ka nkuwa wakwe, a ku nge vi na munhu loyi a va chavisaka; hikuva nomu wa Yehovha wa mavuthu wu swi vurile.” Mfumo wa Xikwembu wu ta herisa hambi ku ri swiphiqo leswi vangiwaka hi mavabyi ni rifu. (Esaya 25:8) Yoleyo yi ta va misava leyinene swonghasi! Hi nga swi kholwa switshembiso leswi swa Bibele hikuva swi huhuteriwe hi Xikwembu hi xoxe.

Bibele a yi nyikeli rungula leri nga ni ntshembo ntsena kambe yi tlhela yi hi pfuna leswaku hi langutana ni swiphiqo swa siku ni siku, swo tanihi ku tivona u nga ri na xindzhuti, leswi nga ha vangiwaka hi ku va munhu a ri xisiwana. Leswi Mukreste la pfumalaka se a dyondzeke Bibele wa swi tiva leswaku i wa risima emahlweni ka Xikwembu ku fana ni Mukreste la fuweke. Buku ya Bibele ya Yobo yi hlamusela leswaku Xikwembu “a [xi] n’wi khathalelanga wa xiyimo xa le henhla ku tlula xisiwana, hikuva hinkwavo ka vona i ntirho wa mavoko [ya xona].” (Yobo 34:19) Xikwembu xi va rhandza hinkwavo hi ndlela leyi fanaka.—Mintirho 10:34, 35.