Rungula Leri Nyikaka Xivindzi Ni Ku Tiyisa Ripfumelo Timbhoni Ta Yehovha eUkraine
TANIHI leswi Vakreste va lembe-xidzana ro sungula va xanisiweke, ninamuntlha vanhu va Xikwembu va ha xanisiwa. (Matewu 10:22; Yohane 15:20) A ti talanga tindhawu leti eka tona nxaniso wu tekeke nkarhi wo leha kumbe wu veke wa tihanyi ku fana ni le Ukraine, laha ntirho wo chumayela hi Mfumo wu yirisiweke ku ringana malembe ya 52.
Buku Ya Lembe Ya Timbhoni Ta Yehovha Ya 2002 yi hlamusele leswi vanhu va Xikwembu va le tikweni rolero va langutaneke na swona. I rungula ra mayelana ni ripfumelo, xivindzi ni matimba leswi va veke na swona loko va xanisiwa. Tinhlamuselo to tlangela leti rhumeriweke ehofisini ya rhavi ya le Ukraine ya Timbhoni ta Yehovha hi leti landzelaka:
“Ndzi hete ku hlaya Buku Ya Lembe Ya 2002. Loko ndzi ri karhi ndzi hlaya hi ntirho wa n’wina wa le Ukraine, a swi ndzi ririsa. Ndzi tsakela ku mi byela ndlela leyi xikombiso xa ku hiseka ka n’wina swin’we ni ripfumelo ra n’wina swi ndzi khutazeke ha yona. Ndza tinyungubyisa hi ku va ndzi ri endyangwini wun’we wa moya swin’we na n’wina. Ndzi nkhensa ndzi vuyelela!”—Andrée wa le Furwa.
“Ndzi pfumala ni marito yo hlamusela ndlela leyi ndzi tlangelaka Yehovha na n’wina ha yona, hikwalaho ka Buku Ya Lembe Ya 2002. A ndzi xiririka mihloti loko ndzi ri karhi ndzi hlaya mintokoto yo tala ya vamakwerhu lava dyeriweke nkarhi wa vona hi ku hoxiwa ekhotsweni ni le tikampeni ta nxaniso malembe yo tala. Ndzi xixima xivindzi lexi va veke na xona. Hambileswi ndzi veke Mbhoni malembe ya 27, ndza ha dyondza swo karhi eka vamakwerhu volavo. Va tiyise ripfumelo ra mina eka Tata wa hina la nge matilweni, Yehovha.”—Vera wa le khale ka Yugoslavia.
“Ndzi tsala papila leri ndzi tsakile hikwalaho ka xikombiso xa n’wina lexinene xa ku tiyisela ni ku tshembeka emalembeni wolawo hinkwawo ya ku kanetiwa. Ku tshembela eka Yehovha ni ku tiyimisela ka n’wina ku tshama mi tshembekile swi endla leswaku mi xiximiwa. Tlhandlakambirhi, ku tiyisela ka n’wina loko mi ri karhi mi ringiwa, swa ndzi tiyisekisa leswaku Yehovha a nga va tshiki vanhu vakwe. Hikwalaho ka xikombiso xa n’wina lexinene xa ku va ni xivindzi ni ku tiyisela, hi nga swi vona swi nga ri nchumu swiphiqo swa hina.”—Tuteirihia wa le French Polynesia.
“Loko ndzi hete ku hlaya Buku Ya Lembe, ndzi boheke ku mi tsalela. Mintokoto hinkwayo leyi khutazaka swonghasi yi ndzi khumbe ngopfu. Ndzi titwe ndzi tsakile ku va ndzi ri xirho xa nhlengeletano leyi yo tshembeka, leyi nga ni vun’we leyi kongomisiwaka hi Tatana wa rirhandzu, la khathalelaka, loyi a tiyisaka vanhu vakwe loko va lava mpfuno. Swi ndzi hlunamisile ku tiva leswaku malandza ya Yehovha lama hisekaka swonghasi ma xanisiwe ngopfu hambi ku ri ku dlayiwa. Kambe hi hala tlhelo, ndzi tsake ngopfu, hileswi va nga vanyingi vanhu lava va dyondzeke ntiyiso ivi va tiva Tata wa hina la nga ni rirhandzu, hikwalaho ka xivindzi ni ku hiseka ka malandza wolawo.”—Colette wa le Netherlands.
“Mina ni nsati wanga hi vone swi fanerile ku mi tsalela hi mi byela leswaku timbilu ta hina ti khumbeke swinene loko hi ri karhi hi hlaya hi ta le Ukraine eka Buku Ya Lembe. N’wina vamakwerhu lava tshembekaka mi veke xikombiso lexikulu xa ku tiyisela ehansi ka maxangu yonghasi lama heteke malembe. Hi ku pfumelelana ni marito lama nga eka Swivuriso 27:11, Yehovha u fanele a tsaka swinene ku tiva leswaku vamakwerhu vo tala swonghasi lava tshembekaka va le Ukraine va tshame va tshembekile ku nga khathariseki swiendlo swa Diyavulosi swa vuhomboloki.”—Alan wa le Australia.
“A ndzi khapakhapa mihloti loko ndzi ri karhi ndzi hlaya hi ta vamakwerhu va le Ukraine. Va tiyisele swilo swinyingi—ku pfaleriwa malembe yo tala ekhotsweni, ku xanisiwa, ku tshikileriwa ni ku hambanisiwa ni mindyangu ya vona. Vamakwerhu hinkwavo lava ha riki kona ni sweswi emavandlheni ya ka n’wina, ndzi lava ku va byela leswaku ndzi va rhandza ngopfu naswona ndza va xixima swinene. Ndzi tsakisiwa hi xivindzi ni ku tserhama ka vona. Ndza swi tiva leswaku moya wa Yehovha hi wona a wu va nyika matimba wolawo. Yehovha u le kusuhi na hina, naswona u lava ku hi pfuna.”—Sergei wa le Rhaxiya.
“Ndzi hlaye Buku Ya Lembe Ya 2002, kutani ndzi ku xibuku, ndzi rila. Vamakwerhu vo tala va le vandlheni ra ka hina va vulavule hi n’wina. Mi va risima hakunene. Na mina ndza tsaka ku va xirho xa ndyangu lowu lowukulu wa moya.”—Yeunhee wa le Korea Dzonga.
“Mhaka ya ripfumelo ra n’wina, ku tiyisela ni ku rhandza ka n’wina Yehovha ni Mfumo wa yena, yi ndzi khumbe swinene. Minkarhi yin’wana a hi wu xiyi ntshunxeko lowu hi nga na wona swin’we ni ndzalo ya swakudya swa moya leswi Yehovha a hi phamelaka swona. Kambe, sweswo a swi vanga tano eka n’wina. Xikombiso xa ripfumelo ra n’wina xi hi pfuna ku xiya leswaku loko hi ri ni vuxaka lebyikulu ni Xikwembu, xi ta hi nyika matimba yo langutana ni miringo ya mixaka hinkwayo.”—Paulo wa le Brazil.
“Ndzi ve ni lunghelo ro hlaya mintokoto ya n’wina eka Buku Ya Lembe Ya 2002. Yi ndzi tsakise swinene, ngopfu-ngopfu ntokoto lowu khumbaka mbilu wa Makwerhu Lydia Kurdas. Ndzi titwe ndzi ri ni vuxaka lebyikulu ni makwerhu loyi.”—Nidia wa le Costa Rica.
“Namuntlha ndzi hete ku hlaya Buku Ya Lembe Ya 2002. Loko ndzi ri karhi ndzi yi hlaya, ripfumelo ra mina eka Yehovha ri tiyisiwile. Mhaka yin’wana leyi ndzi nga ta ka ndzi nga yi rivali i ya ku byariwa ka moya wa ku kanakana vutshembeki bya vamakwerhu lava rhangelaka. Yi ndzi dyondzise leswaku ndzi nga tshuki ndzi kanakana vamakwerhu lava rhangelaka. Ndzi vonga hi ntamu! Swakudya leswi swa moya swi tiyisa ripfumelo ni ku hi endla hi lunghekela nkarhi lowu ripfumelo ra hina ri nga tshukaka ri ringiwa ha wona.”—Leticia wa le United States.
“Hi yi tlangela ngopfu Buku Ya Lembe leyi ya kahle swinene. Vahuweleri vo tala a ku ri ro sungula va hlaya hi ta ntirho wa vamakwerhu va le Ukraine. Vamakwerhu va tiyisiwe swinene haleno. Vamakwerhu vo tala, ngopfu-ngopfu vantshwa, va ndlandlamuxe ntirho wa vona wa nsimu. Van’wana va sungule ku va maphayona ya nkarhi hinkwawo kumbe ya nkarhinyana. Hinkwavo va khutaziwe hi timhaka ta vamakwerhu va xinuna ni va xisati lava tirheleke Yehovha hi nkarhi wa ku yirisiwa.”—Komiti ya ntirho ya vandlha eUkraine.
Hakunene ku tshembeka ka vamakwerhu va le Ukraine ku ve xikhutazo lexikulu eka vanhu va Yehovha emisaveni hinkwayo. Entiyisweni, ku tshama hi ri karhi hi hlaya marungula lama khutazaka lama nga enkandziyisweni wun’wana ni wun’wana wa Buku Ya Lembe, i ndlela leyinene yo tiyisa ripfumelo ra hina ni ku hi pfuna ku tiyisela eminkarhini leyi yo tika.—Vaheveru 12:1.