Ku Ta Va Ni Misava Leyi Pfumalaka Vugevenga eNkarhini Lowu Taka

ANAKANYA hi misava leyi pfumalaka swigevenga! A ku nge he laveki maphorisa, makhotso kumbe tindlela to tenga milandzu leti lavaka mali yo tala ni leti rharhanganeke. Ku ta va misava leyi eka yona munhu un’wana ni un’wana a nga ta xixima vutomi ni swilo swa vanhu van’wana. Kumbexana a wu pfumeli leswaku ku hundzuka ko tano ku ta va kona. Kambe sweswo hi leswi Bibele yi tshembisaka swona. Ha yini u nga kambisisi leswi Matsalwa ma swi vulaka ka ha ri emahlweni malunghana ni vugevenga swin’we ni vubihi byin’wana lebyi nga kona laha misaveni?

Ebukwini ya Tipisalema, ha hlaya: “U nga karihi hikwalaho ka lava endlaka swo biha. U nga va vondzoki lava endlaka leswi nga lulamangiki. Hikuva hi ku hatlisa va ta vuna ku fana ni byanyi, hi ku hatlisa va ta vuna ku fana ni byanyi bya rihlaza lebya ha humaka. Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.” (Pisalema 37:1, 2, 11) Hakunene, a nga kona loyi a nga sivelaka Xikwembu leswaku xi hetisisa xitshembiso lexi swin’we ni switshembiso leswin’wana hinkwaswo leswi tiyisaka nhlana.

Xikwembu xi ta tisa mikateko leyi hi ku tirhisa Mfumo wa xona. Eka Xikhongelo xa Hosi, Yesu Kreste u dyondzise valandzeri vakwe ku khongelela Mfumo lowu leswaku wu ta, nileswaku ku rhandza ka Xikwembu ku endleka “emisaveni, hilaha ku endlekaka hakona etilweni.” (Matewu 6:9, 10) Ku nga ri khale, ehansi ka Mfumo wolowo, a nga kona munhu wa laha misaveni loyi a nga ta endla vugevenga hikwalaho ka vusweti, ntshikilelo kumbe vutianakanyi. Ematshan’weni ya sweswo, Rito ra Xikwembu ri ri: “Ku ta va ni mavele yo tala emisaveni; ma ta khapakhapa etinhlohlorhini ta tintshava.” (Pisalema 72:16) Hakunene, Yehovha Xikwembu u ta enerisa munhu wihi ni wihi wa laha misaveni hi mphakelo lowukulu swinene wa swilo leswinene. Xa nkoka ngopfu, vanhu va ta rhandza Xikwembu swinene va tlhela va rhandza vaakelani va vona, naswona misava a yi nge he kavanyetiwi hi vugevenga.