Xana U Hlakulela Moya Wa Ku Tlangela Swilo Leswi Hlamarisaka?

ANA wa swi xiya leswaku hakanyingi vatsari va Bibele va ku nyika xivangelo xa ku hlamala loko va bumabumela mintirho ni timfanelo ta Xikwembu? Mupisalema u te: “Ndzi endliwe hi ndlela yo hlamarisa.” (Pisalema 139:14) Muprofeta Esaya u tsarile: “Oho Yehovha, u Xikwembu xanga. Ndza ku tlakusa, ndzi dzunisa vito ra wena, hikuva u endle swilo swo hlamarisa.” (Esaya 25:1) Kumbe, anakanya hi ku hlamala ni ku chava loku phofuriweke hi muapostola Pawulo loko a ku: “Mawaku ku enta ka rifuwo ni vutlhari ni vutivi bya Xikwembu!”—Varhoma 11:33.

The Oxford Encyclopedic English Dictionary yi hlamusela rito leri nge ku “hlamala” yi ku i “ntlhaveko lowu pfuxiwaka hi nchumu wa xitshuketa, lowu nga tolovelekangiki kumbe lowu nga hlamuselekiki, ngopfu-ngopfu lowu fambisanaka ni ku tshuka kumbe ku hisekela ku tiva mhaka yo karhi, ni swin’wana.”

Xana a swi tsakisi ku vona vana va humesa matihlo hi ku hlamala loko va vona kumbe va twa swilo leswi va nga si tshamaka va swi twa? Khombo ra kona, ku hlamala koloko loku fambisanaka ni ku navela ku tiva nchumu wo karhi lowuntshwa, hakanyingi ka hela loko va ya va kula.

Kambe eka vatsari va Bibele lava tshahiweke laha ku hlamala a swi ri engatini. Va tshame va ri na kona malembe yo tala. Ha yini? Va hlakulele moya wa ku tlangela swilo leswi hlamarisaka hi ku anakanyisisa hi mintirho ya Xikwembu. Mupisalema u khongerile: “Ndzi tsundzuka malembe ya khale swinene, swilo hinkwaswo leswi u swi endleke; swihlamariso swa ntumbuluko wa wena swi tata mianakanyo ya mina.”—Pisalema 143:5, The New English Bible.

Swa tsakisa hakunene leswi moya lowu wa ku tlangela swilo leswi hlamarisaka wu nga kona ni le ka vagandzeri va Xikwembu va manguva lawa! Xana wena u na wona moya wa ku tlangela swilo leswi hlamarisaka? Xana wa wu hlakulela?