Xana Xikwembu Xa Khathala Hi Hina?

XANA nkarhi wun’wana u ti kuma u tshikileleke ngopfu hikwalaho ka swiphiqo swa ndyangu, rihanyo, ntirho kumbe hi vutihlamuleri byin’wana? Vanhu vo tala va le ka xiyimo lexi. Naswona xana u kona namuntlha la nga karhatiwiki hi vuhomboloki, vugevenga ni madzolonga? Hakunene, swi hilaha Bibele yi vulaka ha kona loko yi ku: “Ntumbuluko hinkwawo wu hambeta wu konya ni ku vaviseka swin’we ku ta fika sweswi.”(Varhoma 8:22) A swi hlamarisi leswi vanhu vo tala va vutisaka va ku: ‘Xana Xikwembu xa khathala hi hina? Xana xi ta hi pfuna?’

Hosi Solomoni wo tlhariha u khongele eka Xikwembu a ku: “Wena u ri wexe u yi tiva kahle mbilu ya vana va vanhu.” Solomoni a a tshemba leswaku Xikwembu a xo hi tiva ntsena kambe xi tlhela xi khathala hi un’wana ni un’wana wa hina. U swi kotile ku kombela Xikwembu leswaku xi “swi twa [xi] ri ematilweni” ni ku hlamula swikhongelo swa un’wana ni un’wana la chavaka Xikwembu loyi a byelaka Xikwembu hi “khombo rakwe ni ku vaviseka kakwe.”—2 Tikronika 6:29, 30.

Ni namuntlha, Yehovha Xikwembu wa ha khathala hi hina naswona wa hi rhamba leswaku hi tshinela eka yena hi xikhongelo. (Pisalema 50:15) U tshembisa leswaku u ta swi hlamula swikhongelo swa hina leswi humaka embilwini, leswi fambisanaka ni ku rhandza ka yena. (Pisalema 55:16, 22; Luka 11:5-13; 2 Vakorinto 4:7) Ina, Yehovha u yingisa “xikhongelo xin’wana ni xin’wana, xikombelo xin’wana ni xin’wana xa ku kombela tintswalo lexi xi nga endliwaka hi munhu wihi ni wihi kumbe hi vanhu va [yena] hinkwavo.” Hikwalaho, loko hi veka ntshembo wa hina eka Xikwembu, hi khongelela mpfuno wa xona, ni ku tshinela ekusuhi na xona, hi ta kuma nkhathalelo wa xona wa rirhandzu ni nkongomiso wa xona. (Swivuriso 3:5, 6) Yakobo mutsari wa Bibele wa hi tiyisekisa: “Tshinelani eka Xikwembu, kutani xi ta tshinela eka n’wina.”—Yakobo 4:8.