Ha Yini Timbhoni Ta Yehovha Ti Tshama Ti Ri Karhi Ti Ku Endzela?

VANHU va swi tiva kahle leswaku Timbhoni ta Yehovha ta phikelela evutirhelini bya tona bya yindlu ni yindlu emisaveni hinkwayo. Vanhu van’wana va tivutisa leswaku ha yini Timbhoni ti tshama ti ri karhi ti va endzela, ngopfu-ngopfu loko va nga kombisanga ku tsakela eka rungula ra Timbhoni loko ti va endzela enkarhini lowu hundzeke. Ku ni mapapila mambirhi lama humaka eRhaxiya lama pfunaka ku hlamusela xivangelo xa kona.

Masha, nhwanyana un’wana wa le Khabarovsk la nga ni malembe ya 19 hi vukhale, wa pfumela: “Entiyisweni, enkarhini lowu hundzeke a ndzi ringeta hi matimba leswaku ndzi papalata Timbhoni ta Yehovha.” Hambiswiritano, endzhaku ko hlaya tikopi to hlayanyana ta timagazini leti kandziyisiwaka hi Timbhoni, u cince langutelo ra yena. Masha wa tsala: “Hinkwaswo leswi ndzi swi hlayeke eka timagazini leti a swi tsakisa swi tlhela swi pfula mahlo, kambe xa nkoka swinene, swi endla leswaku u va ni langutelo leri hambaneke hi misava. Hakatsongo-ntsongo ndzi sungule ku twisisa leswaku ha yini vanhu va nyikiwe vutomi.”

Svetlana wa le dorobeni ra Ussuriysk, leri nga empfhukeni lowu endlaka 80 wa tikhilomitara ku suka eVladivostok u ya en’walungwini, u tsale a ku: “Ndza ha ku sungula ku hlaya Xihondzo xo Rindza na Xalamuka! Timagazini leti ta laveka swinene eminkarhini leyi ya hina. Ndzi hlaya swihloko hinkwaswo. Swi tsakisa swinene, swa dyondzisa naswona swa pfuna. Ndza mi nkhensa! Ha tsaka swinene ku va ni vanhu vo fana na n’wina laha misaveni ni ku va mi endla ntirho lowu lowunene, lowu lavekaka.”

Timbhoni ta Yehovha emisaveni hinkwayo ti xi teka xi ri xa nkoka swinene xivutiso xa Pawulo lexi tlhontlhaka mianakanyo: “Hilaha ku fanaka, [vanhu] va ta swi twisa ku yini loko ku nga ri na loyi a chumayelaka?” (Varhoma 10:14) Ha yini u nga tinyiki xinkarhana xo yingisela loko Timbhoni ti ku endzela enkarhini lowu taka? Na wena u nga tsakela rungula leri chavelelaka leri kumekaka eRitweni ra Xikwembu, ku nga Bibele.