Malandza Ya Xikwembu Ma Fana Ni Mirhi—Hi Tindlela Tihi?
LOKO a vulavula hi munhu loyi a tsakelaka ku tirhisa misinya ya milawu ya Bibele evuton’wini bya yena, mupisalema u te: “Kunene u ta fana ni murhi lowu byariweke etlhelo ka swinambyana swa mati, lowu humesaka mbhandzu wa wona hi nguva ya kona, lowu switluka swa wona swi nga vuniki, hinkwaswo leswi a swi endlaka swi ta humelela.” (Pisalema 1:1-3) Ha yini xifananiso lexi xi faneleka kahle?
Mirhi yi nga hanya nkarhi wo leha swinene. Hi xikombiso, mitlhwari yin’wana ya le ndhawini ya Mediteraniya ku vuriwa leswaku yi ni malembe yo sukela eka gidi ku ya fika eka magidi mambirhi hi vukhale. Hilaha ku fanaka, ximuwu xa le Afrika xikarhi xi hanya nkarhi wo leha, naswona eCalifornia ku vuriwa leswaku ku ni muphayini lowu nga ni kwalomu ka 4 600 wa malembe hi vukhale. Ekhwatini mirhi leyi kuleke yi helela hakanyingi yi vuyerisa tindhawu leti yi mileke eka tona. Hi xikombiso, mirhi yo leha yi sirhelela swijanani hi mindzhuti ya yona, naswona matluka lama waka emirhini leyi ma nonisa misava.
Hakanyingi mirhi leyo leha ngopfu emisaveni yi mila swin’we emakhwatini, laha murhi ha wun’we wu tiyisaka wun’wana. Tanihi leswi timitsu ta yona ti nga ha vaka ti phasanile, mirhi yo hlayanyana yi nga tiyiselela xidzedze ku tlula loko yi mile yoxe laha ku nga riki na mirhi yin’wana. Timitsu letikulu nakambe ti endla leswaku murhi wu kota ku kuma mati lama eneleke ni swiaki swin’wana emisaveni. Minkarhi yin’wana, timitsu ti nga ha nghena endzeni-ndzeni ka misava ti hlanganisa mpfhuka lowu hundzaka mpimo wa ku leha ka murhi, kumbe timitsu ti nga nava ti ya ematlhelo ti hundza laha matluka ya murhi ma fikaka kona.
Swi nga endleka muapostola Pawulo a a vulavula hi murhi loko a vula leswaku Vakreste va fanele va ‘hambeta va famba evun’weni na Kreste, va dzima timitsu ni ku akiwa eka yena ni ku tiyisiwa eripfumelweni.’ (Vakolosa 2:6, 7) Ina, Vakreste va nga yima va tiya ntsena loko va dzime timitsu eka Kreste.—1 Petro 2:21.
Hi tihi tindlela tin’wana leti malandza ya Xikwembu ma nga fanisiwaka na mirhi ha tona? Leswi mirhi leyi mileke swin’we yi seketelanaka, kutani hinkwavo lava tihlanganisaka swinene ni vandlha ra Vukreste va kuma nseketelo eka vapfumeri-kulobye. (Vagalatiya 6:2) Vakreste vo tshembeka lava wupfeke, lava dzimeke timitsu ta moya swi nyawula, va pfuna vapfumeri lavantshwa leswaku va hambeta va tiya eripfumelweni, hambiloko va langutane ni ku kanetiwa lokukulu. (Varhoma 1:11, 12) Lava va ha ku vaka Vakreste va nga tiya hi “ndzhuti” lowu sirhelelaka wa malandza ya Xikwembu lama nga ni ntokoto lowu engetelekeke. (Varhoma 15:1) Kutani swirho hinkwaswo swa vandlha ra Vukreste emisaveni hinkwayo swa vuyeriwa hi swakudya swa moya leswi tiyisaka leswi phameriwaka hi “mirhi leyikulu ya ku lulama,” ku nga masalela lama totiweke.—Esaya 61:3.
Hakunene swa tsakisa ku tiva leswaku malandza ya Xikwembu hinkwawo ma ni ntshembo wo vona ku hetiseka ka xitshembiso lexi kumekaka eka Esaya 65:22 lexi nge: “Masiku ya vanhu va mina ma ta fana ni masiku ya murhi.”
[Laha Xifaniso Xi Humaka Kona eka tluka 28]
Godo-Foto