Xana Ku Endla Leswinene Eka Van’wana Swi Vula Ku Papalata Ku Va Endlela Swo Biha Ntsena?

“LESWI u nga laviki leswaku van’wana va swi endla eka wena, na wena u nga swi endli eka vona.” Ku vuriwa leswaku nawu lowu wa mahanyelo wu vuriwe hi mudyondzisi la dumeke wa Muchayina tlhelo mutivi wa filosofi, Confucius. Ni namuntlha, endzhaku ka malembe ya kwalomu ka 2 500, vo tala va ha pfumela leswaku munhu u lulamile ntsena loko a papalata ku vavisa van’wana.

Ku vula ntiyiso, nawu lowu wa mahanyelo wa Confucius wa pfuna eka swin’wana. Hi hala tlhelo Bibele yi paluxa muxaka wun’wana wa mahanyelo ni ntirhisano wa vanhu. Ku engetela eka leswi swi nga vitaniwaka xidyoho lexi kongomeke, leswi vulaka ku dyohela vanhu-kulobye, Bibele yi vulavula hi xidyoho xo tsandzeka ku endla leswi u tivaka leswaku swi lulamile. Yakobo mudyondzisiwa wa Mukreste u tsarile: “Loko munhu a tiva ndlela yo endla leswi lulameke kambe a nga swi endli, i xidyoho eka yena.” (Yakobo 4:17) Ematshan’weni yo lerisa Vakreste leswaku va nga endli swo biha eka van’wana ntsena, Yesu Kreste u nyikele xitsundzuxo lexi: “Swilo hinkwaswo, leswi mi lavaka vanhu va swi endla eka n’wina, na n’wina mi fanele mi swi endla eka vona.”—Matewu 7:12.

Eku sunguleni Xikwembu a xi lave leswaku vanhu hinkwavo va khomana hi ndlela leyi va nga rhandzaka ku khomiwa ha yona. Xi veke xikombiso lexinene xo anakanyela vuhlayiseki bya van’wana hi ndlela leyi xi vumbeke vanhu ha yona: “Xikwembu xi ya emahlweni xi tumbuluxa munhu hi xifaniso xa xona, xi n’wi tumbuluxe hi xifaniso xa Xikwembu; xi va tumbuluxe va ri waxinuna ni waxisati.” (Genesa 1:27) Leswi swi vula leswaku Xikwembu, hi rirhandzu xona, xi nyike vanhu ripfalo, leri loko ri leteriwe kahle, ri nga va susumetelaka ku khoma van’wana hi ndlela leyi na vona va nga rhandzaka ku khomiwa ha yona.

Vo tala namuntlha va kombiwa maxangu hi vanhu lava nga ni vutianakanyi. Swi le rivaleni leswaku leswi lavekaka a hi ku papalata ku endlela van’wana leswo biha ntsena, kambe ni ku va endlela leswinene ni leswi nga ta va pfuna. Hikwalaho ka leswi, Timbhoni ta Yehovha hi ku tirhandzela ti teka goza ro pfuna van’wana ku dyondza hi ntshembo lowu hlamarisaka lowu kumekaka eRitweni ra Xikwembu. Loko ti endzela vaakelani va tona ti ya va byela mahungu lamanene lama kumekaka eBibeleni, ti endla sweswo hikwalaho ka rirhandzu, ti endlela van’wana leswi ti nga rhandzaka leswaku va swi endla eka tona.