Xana Swikhongelo Swa Wena Swi Nga Xi Antswisa Xiyimo Xa Wena?
A NGA kona exikarhi ka hina loyi a nga si tshamaka a langutana ni xiyimo xo tika swinene. Bibele yi kombisa leswaku muapostola Pawulo a a swi tiva leswaku xikhongelo xi nga antswisa xiyimo xo tano.
Loko Pawulo a pfaleriwe ekhotsweni a nga ri na nandzu le Rhoma, u kombele vapfumeri-kulobye leswaku va n’wi khongelela, a tlhela a ku: “Ngopfu-ngopfu ndzi mi khongotela ku endla leswi, leswaku ndzi ta vuyisiwa eka n’wina hi ku hatlisa.” (Vaheveru 13:18, 19) Eka xiendlakalo xin’wana, Pawulo u kombise ku tiyiseka kakwe leswaku Xikwembu a xi ta hlamula swikhongelo swa yena swa leswaku a hatla a ntshunxiwa. (Filemoni 22) Pawulo u hatle a ntshunxiwa kutani a hambeta a endla ntirho wa yena wa vurhumiwa.
Kambe, xana hakunene xikhongelo xi nga tisa vuyelo lebyinene eka swiphiqo swa wena? Kumbexana. Kambe, tsundzuka leswaku xikhongelo a ko va mukhuva ntsena wa vukhongeri. I ku vulavurisana ka xiviri ni Tata wa hina wa le tilweni la nga ni rirhandzu ni loyi a nga ni matimba. Eswikhongelweni swa hina hi fanele hi titwa hi ntshunxekile ku ba nhloko ya mhaka kutani hi rindzela Yehovha.
Xikwembu xi nga ha hlamula xikhongelo xa hina hi ndlela leyi nga kongomangiki kumbe xi nga hi hlamula hi ndlela leyi hi nga yi rindzelangiki kumbe hi nkarhi lowu hi nga wu rindzelangiki. Hi xikombiso, Pawulo u khongele hi ku phindha-phindha malunghana ni “mutwa [wa yena] enyameni.” Xikwembu a xi xi herisanga xiphiqo xa Pawulo, kambe xi chavelele Pawulo hi marito lama tiyisaka xi ku: “Musa wa mina lowu nga faneriwiki wu enele ha wena; hikuva matimba ya mina ma endliwa lama hetisekeke eku tsaneni.”—2 Vakorinto 12:7-9.
Na hina hilaha ku fanaka, hi nga tiyiseka leswaku hambiloko Xikwembu xi nga susi xiphiqo xo karhi, kambe xi nga hi ‘nyika ndlela yo huma, leswaku hi kota ku tiyisela.’ (1 Vakorinto 10:13) Ku nga ri khale, Xikwembu xi ta herisa ku xaniseka hinkwako loku vanhu va nga na kona. Enkarhini wa sweswi, ku tshinelela “Mutwi wa xikhongelo” swi nga antswisa timhaka.—Pisalema 65:2.